New Delhi Nailur:
Ka kynhun tohkit Enforcement Directorate (ED) ka la kem ïa u MLA jong ka seng AAP u Amanatullah Khan ha ka Lah Sngi U Blei halor ka jingshah kynnoh donkti ban pyndonkam bakla ïa ka pisa ha Delhi Waqf Board mynba u dang long kum u nongpeit.
Ha kawei ka bynta pat, ka la don ka jingsngewkmen na ka bynta ka seng AAP naba u heh ba dei khmih ïa ki surok jong ka seng AAP u Vijay Nair bad u nongïarap ba ïajan jong u Kejriwal u Bibhav Kumar ki la shah pyllait jamin ha ka Supreme Court ha kaba ïadei bad ka mukotduma kaba la mih na ki jingkynnoh ba la pyndkoh treikam hapoh ka tnat Excise.
U MP jong ka seng AAP u Sanjay Singh u la leit ïakynduh ïa ki bahaïing jong u Khan bad ong ha ki nongthoh khubor kumne: “Ka kynhun ED jong ka seng BJP ka la kem ïa u, ha kaba ka la pynduh ïa baroh ka hok longbriew-manbriew. Ka kiaw kurim jong u Amanatullah ka dang shah sumar na ka jingpang bampong ha ki lai ne saw sngi ba la leit. Ka la shah pynkit sha ïing na ka jaka ai jingsumar ha kaba ka la shitom jur…u Amanatullah Khan u la phah jingthoh sha ka kynhun ED na ka bynta ban ai por ïa u, ha kaba u la ong ba ka kiaw kurim jong u kam pat khlaiñ, kumta la dei ban ai por shwa na ka bynta jong u.”
Hashwa kane, ki heh jong ka kynhun Enforcement Directorate ha ka lah sngi U Blei ki la poi ha ka ïingsah jong u Khan na ka bynta ban leit khynra ha kaba ïadei bad ka jingkynnoh donkti ha ka jingkamai ïa ka spah bymhok.
U Amanatullah u la shah kynnoh donkti ha ka jingkamai ïa ka spah bymhok kaba don ka jingïadei bad ka Delhi Waqf Board bad shim wai ïa ki jingdon jingem jong ka.
