Shillong, Nailur 03
U Secretary ka Shillong Sports Association (SSA) u Bah Dipshon Lyngdoh Nongbri u la pyllait paidbah ïa ka YouTube Channel jong ka PFR Football Academy ha ka Lah Sngi U Blei ha madan SSA, Polo.
Ka jingthmu jong kane ka Academy ban don noh ïa la ka jong YouTube Channel ka long halor ka nongrim ban thep ïa ki dur-khih (videos) jingïalehkai jong kane ka shlem ai jinghikai kaba ju ïashim bynta naduh ka lympung ïalehkai ki khynnah rit haduh kiba la heh kynthup ïa ki shynrang bad kynthei hapoh kane ka channel namar ka don bun bha ki nongkyrshan kiba juh kwah ban wan peitkai ïa ki jingïalehkai jong ka PFR, hynrei don pat ki nongkyrshan ki bym lait ban wan peitkai na ka daw ki kam ki jam ki jong ki.
Na ka liang jong u Bah Nongbri u la ai ka jingkhublei ïa kane ka shlem ai jinghikai kaba la shim ïa kane sien jam kaba biang eh. U la bynrap ruh ba u sngewsarong haba ki klob kiba la pynïasoh bad ka SSA kin wanrah ïa kum kane ka bynta kaba long shi bynta ban kyntiew ïa ka lympung ïalehkai.
