Kabul, Nailur:
Ka kynhun Islamic State ha ka Sngi Ba-ar, ka la shim jingkit-khlieh halor ka jingbthei bom hapoh ka nongbah jong ka ri Afghanistan, kaba la shim ia ka jingim jong 6 ngut ha ka sngi ba la leit. Ka jingthmu jong kane ka long ban thombor ia ki heh bad ki Myntri ka tnat aiñ jong ka Taliban.
Katei ka jingbthei kaba la jia ha ka phang Shathie jong ka nongbah Kabul ha ka nohphai sngi jong ka Sngi Nyngkong, kaba la shim ia ka jingim jong 6 ngut bad kumba 13 ngut kiwei pat kiba la mynsaw ha katei ka jingjia.
Ki nongai ktien jong ka IS ki la iathuh ba utei u ‘riew kheiñduh uba long u dkhot jong ka u la ap da ki kynta haduh ynda mih lut ki nongtrei bad ki dkhot jong katei ka tnat namar dei tang ia u Myntri uba dei khmih ia katei ka tnat kaba ki kwah ban thombor.
Hynrei, katei ka kynhun lehnoh IS ka la buh jingkheiñ antad ia ka jingon kiba khlad bad mynsaw na katei ka jingjia kumno-kumno kin don kumba 45 ngut. La ong ruh ba katei ka jingthombor jong katei ka kynhun ha kane ka sien ka long na bynta kito ki dkhot jong ka bad ki Muslim kiba shah kem bad shah set patok ha ki lehnoh Taliban hapoh Afghanistan.
Kumjuh ruh na ka liang jong ka Taliban kaba synshar hapoh Afghanistan, ka la ong ba ka jingshngaiñ jong ki paidbah ka long ka bynta ba kongsan tam bad ia kane, ka Taliban ka la kren naduh ba ka la sdang ban ioh synshar hi biang noh ia ka Afghanistan ha u snem 2021, hadien ka kynrum-kynram jong ki shipai bar ri hapoh ka jingïalam jong ka US ha ki lai snem mynshwa.
Hynrei, da ka jinglah jong ka Taliban ban pynkhlaiñ ia ka jingpahara hapoh ka ri Afghanistan, la ong ba ki kam thombor jong ki lehnoh ki la hiar shibun eh ban ianujor bad ka jinglong- jingman ha kitei ki snem shuwa ban ioh synshar ka Taliban hapoh Afghanistan.
