Moscow, Nailur:
Ki kynhun jong ka tnat iarap ha ka Sngi U Blei ki la iathuh ba ki la lap ia 17 ngut met iap na ka nongbah Kamchatka jong ka Russia hadien ba kawei ka liengsuin ka la leit hap bakla katba ka dang kit ia 22 ngut ki briew ha ka Sngi Saitjaiñ.
Namar la ong ba katei ka liengsuiñ ‘helicopter’ ka la jah rngai noh shi syndon tang hadien ba ka la sdang kiew shalor suiñ ha katei ka sngi bad katei ka liengsuiñ ka don 19 ngut ki nongjngohkai pyrthei kiba shong hapoh ryngkat 3 ngut ki dkhot bad nongkhmih jong ka.
Ka Kamchatka ka dei ka thaiñ kaba itynnad bha. Ka long ruh ka jaka khlaw kaba pawnam bha na ka bynta nongleit jngoh-kai pyrthei namar ka jingdon u lum mih ding ba dang im bad ka mariang kaba khuid kaba pynitynnad bad pynshoh-biej ia ki nongpeitkai khamtam haba ioh ban peitkai ia katei ka jaka bad kitei ki lum nalor suiñ.
Hynrei ha ka step Sngi U Blei, la ong ba ki kynhun jong ka tnat iarap ki la shem pat ia ki lyngkhot-lyngkhai ba la julor na katei ka helicopter na kawei ka jaka lum ha ka kynjang kumba 900 meter.
Katei ka liengsuiñ ‘Mi-8’ ka dei ka liengsuiñ shipai kaba la shna da ka Soviet bad kaba ju pyndonkam bha ha ka leit ka wan ha Russia.
Kane ka liengsuiñ kaba la hap ka dei kaba la pynïaid da kawei ka kompani kaba don ha Kamchatka kaba la ai kyrteng ‘Vityaz-aero’ kaba pyntreikam khnang ïa ki liengsuiñ na ka bynta ban kyntiew ia ka kam jngohkai pyrthei ha katei ka ri.
