Khliehriat, Nailur 05
Ka Diengshalalu bad ka Lumputhoi ki la jop ha ka lympung ïalehkai Second Division Football Tournament ba la pynïaid da ka East Jaiñtia Hills District Football Association (EJHDFA) ha madan Artificial Turf, Deinshynrum ha ka Sngi Palei.
Ha kane ka jingïakhun, ka Dienshalalu SC ka la pynliem noh ïa ka Rymbai Pohskur SC da 2-0 kol. Ïa kine kol la thep da u Mulning Rymbai ha ka minit kaba 72 bad kawei pat la ïarap pynthep da uwei na ki rangïalehkai ka liang pyrshah u Riio Lyngdoh ha ka minit ba 79.
Ha ka jingïakhun kaba bud, ka Lumputhoi SC ka la jop da 2-0 kol pyrshah ïa ka SWO Moosianglamare Old. Ïa kine la thep da u Rishan Lyngdoh ha ka minit kaba 7 bad u Klas Lyngdoh ha ka minit ba 22.
Ka jingïalehkai ha ka sngi Thohdieng ha ka Third Division kan long hapdeng ka Ïapmala Wahshnong SC pyrshah ïa ka Umtyra ha ka por 10:30 baje mynstep, ka Moopala SCSC ïa ka Khliehriat East YWSC ha ka por 12:30 bad ka Umrasong SCC ïa ka Nongthymme SC ha ka por 2:30 baje nohphai sngi.
