Shillong, Naitung 19
Ka Mawpdang SC ka la long ka lahduh ha ka lympung ïalehkai U-20 4th Division Football League 2026 ba la pynïaid da ka Shillong Sports Associa-tion (SSA), hadien ba la lah ban pynliem noh ïa ka Seila Sap Football Coa-ching Centre da 2-0 kol ha ka jingïakhun final kaba la long ha ka sngi Saitjaiñ ha SSA Stadium kaba ha First Ground, Polo.
Kane ka nam jop ka la wan lyngba ki kol ba la thep da u Banaijingshai Kharkongor bad Mar-biang Kharbhih na ka bynta ban pynlong ïa kane ka kynhun ban ïohpdiang ïa ka khusnam pisa kaba T. 60 hajar tyngka lem bad ka trophy, katba ka Saila Sap ka la ïoh T. 30 hajar tyngka.
Kumba ka paw kane ka jingïakhun final ka la long kaba itynnad bad kaba ïakhaid bha lyngba ka jingïakhun tyngeh da kine ki kynhun. Ka Mawpdang ka la ïoh ban pynkhih jar nyngkong eh lyngba u Banaijingshai ha ka minit kaba 10. Kane ka shi kol ka la neh haduh kaba kut jong ka kylla step.
Watla ka Mawpdang ka dangtam shi kol, hynrei ki rangïalehkai ka Sei La Sap ka la pyrshang ban ïakhun tyngeh ha ka kylla miet ha kaba ka la ïoh ïa ki katto katne ki kabu kiba biang ban thep kol, hynrei kam shym la lah ban pynurlong na ka daw ka jingtbit u rangapkol ka Mawpdang.
Hashwa ban wai ka Mawpdang ka la ïoh ban thep biang sa shi kol ha ka minit kaba 80 lyngba u Marbiang bad ban khur syndon ïa ka jingjop.
Ïa ka nam Man of the Match la khur da u rangapkol ka Mawpdang SC u Embhalang Khongnoh, katba ka nam Top Score ka leit sha u rangïalehkai ka Mawpdang u Marbiang Kharbhih lem bad u Samphrangshai Rani na ka Nongkseh United FC, kiba la thep mar 10 kol ha kane ka lympung.
Kaba sngewtynnad ka long ba kine bar ar ki kynhun kin ïoh ban ïashim bynta sa ka Champions Cup 2026 ka ban pynlong biang mynta u snem namar dei tang ki lahduh bad ba wan ba-ar ki kin ïoh ban ïashim bynta ha kane ka lympung.
Nalor ka Mawpdang bad ka Seila Sap, ka Golflink SC bad ka Weilyngkut Area FCC, kiba la shah rem ha ka semi final, ki la ïoh kiew kyrdan sha ka Third Division ha kaba kin ïoh ban shim bynta ha u snem ban wan.
