Jowai, Nailur 05
Ka Shangpung Moosyiem bad Panaliar ki la ïoh jingjop ha ka lympung ïalehkai Second Division Football Tournament (7th Debo Shullai Memorial Trophy) ba la pynïaid da ka West Jaiñtia District Sports Association (WJDSA).
Ha kane ka jingïalehkai kaba la long ha Kiang Nangbah Stadium, Jowai, ka Shangpung Moosyiem ka la pynliem noh ïa ka Khlieh Myntang Ïalong da 2-1 kol.
Ha kane ka jingïakhun ka Khlieh Myntang Ïalong ka la ïoh pynkhih jar nyngkong eh lyngba u Jaymz Bryan Pale ha ka minit kaba 51. Hynrei ka Shangpung ka la lah ban pynphai kylla ar kol lyngba u Da o Langbang ha ka minit kaba 57 bad u Shickil Langbang ha ka minit kaba 61 na ka bynta ban jop shi syndon.
Ha kawei pat ka jingïalehkai kaba bud, ka Panaliar ka la jop da 1-0 kol ïa ka Lumpariat. ïa kane ka kol la thep da u Samhame Sumer ha ka minit kaba 34.
Ha ka Sngi Thohdieng ka jingïalehkai kan long hapdeng Lumbhahdakha Wahïajer pyrshah ïa ka Lutituber Ïalong ha ka por 12 baje mynsngi, katba ka Rising Sun Mukhla ïa ka Ïawmulong Nartiang ha ka por 2 baje nohphai sngi.
