Washington, Nailur:
U President ka US- u Joe Biden ha ka jingiakren bad u Myntri Rangbahduh ka India u Narendra Modi lyngba ka phone ha ka taiew ba la dep, u Biden u la pynpaw ïa ka jingsngewkhia halor ka jingshngaiñ jong ki briew ha Bangladesh bad ka lawei jong ki tnat synshar paidbah ha katei ka ri.
Ha katei ka jing-iakren phone u Biden bad u Modi, ki la pynpaw markylliang ïa ka jingsngewkhia haba iadei bad ka jinglong-jingman ha Bangladesh bad kumta ruh la ong ba kine ki nongialam jong arliang ri ki la iakren ban pynbeit bad ialeh ban iatrei lang na ka bynta ka bha- ka miat bad ka jingshngaiñ jong ki paidbah ha katei ka ri kaba la mad ia ki jingiakynad, ki jingiakhih bad shibun ki kynrum-kynram namar ka jingbym biang ha ka ioh- ka kot bad kumjuh ruh ha ka liang ka synshar- khadar ha kine ki por ba la leit.
