Beijing, Nailur:
Katkum ki kaiphod ba la ioh lum da ka Ukraine, la ong ba ka Jilin Chemical Fiber Group, kaba dei trai jong ka sorkar China, ka la pynbiang ïa ka Russia, ïa ki tiar kiba donkam naka bynta ban pyndonkam ha ka ban shna ïa ki drone ban ïakhun thma.
Ki kot ki sla ki pyni ba 46 ton jong u kynja dawai ba la pyndonkam ban shna ïa ka carbon fiber kaba khlaiñ bha la phah sha Alabuga-Volokno, kaba dei ka tnat jong ka kompeni pynmih bor ding jong ka sorkar jong ka Russia, ka Rosatom, katkum ki kot ki sla, kiba la bishar bniah da ka Politico.
Katei ka kompeni, ka don bynta ha kaba pynmih ïa ki tiar, kiba pyndonkam ha ki liengsuiñ Geran kamikaze jong ka Russia, kaba pynshong nongrim ha ka rukom shna liengsuiñ Shahed jong ka Iran.
La iathuh ba ïa katei ka jingshalan la pynlong ha kaba sdang jong une u snem. Ki kot ki sla ki pyni ba ïa katei ka tiar, kaba la tip kum ka PAN, la buh kyrteng hapoh ka kyndon khajna, kaba ju pyndonkam na ka bynta ki tiar ba la shna da ki riew paidbah, kum ka nylon bad ka polyester.
U David Albright, uba dei u riew shemphang ha ki tiar ialeh jong ka US, u la antad ba katei ka pisa kaba la phah na China, ka lah ban pynbiang ïa ka carbon fiber kaba biang na ka bynta haduh 1,300 tylli ki kamikaze drone.
Ia kine ki kot ki sla la ioh da ka Ukraine Security and Cooperation Centre (USCC) bad la iasam lang bad ka sorkar US bad UK.
Ka US bad ki paralok jong ka, ki la kynnoh bunsien ïa ka China, ba ka pynbiang ïa ka Russia, da ki mar ba lah ban pyndonkam arsien. Ia kine ki mar lah ban pyndonkam na ka bynta ki riew paidbah bad ki kam shipai.
Hynrei ka China ka la kyntait ban ai tiar ialeh sha ka Russia. Ka embassy jong ka ha America ka la ong ba ka China kam shym la ai satia ïa ki tiar pyniap briew sha kano kano ka liang ha ka thma Ukraine bad ka pyrkhing bha ïa ka jingshalan ïa ki tiar ba pyndonkam arsien. Hynrei ki heh barim jong ka US ki la ong ba kan long kaba eh ïa ka kompeni jong ka sorkar China ban shna ïa kum kane ka jingshalan khlem da tip ki heh sorkar ïa kane.
Ka Russia ruh ka la kyntait ïa kitei ki jingkynnoh. U nongaiktien jong ka Rosatom u la ong ba ka kompeni ka treikam hapoh ki ain jong ka Russia bad u la khot ïa ki jingkynnoh ba ki leh bakla ki long kiba bakla.
Ka USCC ka la ong ba ka la lap ïa ki rekod ba ym duna ïa ka 8 tylli ki tender na ka bynta ka jingshalan ïa ki dawai PAN precursor na ka Jilin Chemical Fiber Group sha Alabuga-Volokno naduh u snem 2022. Ka Alabuga-Volokno ka la don hapoh ki jingpynjari jong ki ri Sepngi naduh u snem 2023. Hynrei ki sorkar jong ka Ri Sepngi kim shym la shah pynjari ha ka Jilin Chemical Fiber Group.
Kine ki jingpynpaw ki wan tang katto katne taiew shuwa ba u president jong ka America, u Donald Trump, un khmih lynti ba un iakynduh ïa u president jong ka China, u Xi Jinping, ha America.
