Washington, Nailur:
Katkum ki khubor, la ong ba ki 12 tylli ki ri kynthup ïa ka Britain, Canada bad France, ki la pynbna ha ka sngi thohdieng, ba kin khang pyrshah ïa ka khaii pateng bad ki jaka sah jong ki Israel ha West Bank, hadien ba ki la nang pynjur ïa ki jingthombor jong ki nongshong shnong pyrshah ïa ki nong Palestine ha ka jaka ba la shah knieh.
Ka Denmark, Finland, Iceland, Ireland, Norway, Poland, Portugal, Spain, bad Sweden ruh ki thmu ban pynmih ïa ki kyndon khanglad halor ka khaii pateng bad ki jaka shong jaka sah, la ong ki myntri bar ri jong kine ki ri ha ka jingpynbna ba ïatreilang.
Kane ka jingleh ka long hadien ki taiew ba la nang jur ki jingthombor jong ki nongshong shnong Israel pyrshah ïa ki shnong Palestine ha ka jaka ba la bat beaiñ kaba la ïoh ïa ka jingpynrem kaba jur na ki ri ka pyrthei.
Ka Ireland bad ka Spain, ki la dep ban shim ïa ki lad ki lynti ban pyrshah ïa ka khaii pateng bad ki jaka shong jaka sah jong ki Israel, bad ka France, la bun taiew, ka la pynbor ïa ka rai kaba kum kane, na ka European Union, kaba dei ka paralok khaii pateng jong ka Israel, hynrei, la khanglad ïa ka, da ki katto katne ki dkhot jong ka.
Ki 12 ngut ki myntri ki la ong ba ki jingleh jong ka sorkar Israel ha West Bank ki long kiba “pynduh ïa ka jinglah ban ioh ïa ka jingpynbeit hapdeng ar tylli ki jylla” da kaba kdew ïa ka plan ha kaba ar tylli ki jylla — kawei ka Israel bad kawei ka Palestine — kin im suk im saiñ marjan marjan.
“Ka jinglong jingman ka nang sniew stet hapdeng ki jingshah thombor jong ki nongshong shnong bad ka jingpynheh ïa ki jaka shong jaka sah kiba khlem pat ju jia mynno mynno ruh,” ki la maham.
Ka plan pynbeit ïing E1 — kaba la mynjur da ka Israel ha u snem ba la dep hadien da ki phew snem ba la pynsangeh, khamtam eh namar ka jingpynbor na ki bor synshar US kiba bud ryntih — kan ïohi ïa ki 1,200 tylli ki ïing ban tei ha West Bank.
Kan pyniakhlad shuh shuh ïa ka Jerusalem mihngi kaba la pyniasoh da ki Israel na kiwei pat ki jaka ba la knieh.
Ha ka jingkren jong u sha ka iing dorbar jong ka UK, u myntri kam bar ri jong ka Britain, u Ed Miliband, u la kynthoh ïa ka sorkar Israel, ba ka la “peit matlah” ïa kaei kaba u khot ka “jingpynkhuid jaitbynriew” da ki nongwan buhai shnong jong ka Israel.
