Nongstoiñ, Nailur 06
Kan dei ka sien kaba nyngkong eh ba ka West Khasi Hills kan ïoh ïa ka madan ïalehkai futsal ïa kaba la tip kum ka ‘Leonel Futsal Arena’ bad ïa kane la plie paidbah ha ka Sngi Palei ha kawei na ki jaka ha ka shnong Pyndengrei, Pdengshong kaba ha Nongstoiñ.
Ïa kane ka madan ïalehkai la shna bad tei da ka ïing ka sem jong ka Kong Bibiana Wahlang bad ka jingthmu ka long ban pynsah nam ïa la u kpa u (L) Leonel Marweiñ. Haba phai khyndiat sha katei ka madan Futsal, ïa kaba katei ka longïing ka la shna ha katei ka jaka, kala long shisha kaba la pynbit pynbiang bha nadong sha dong, kata la lah ban ïohi naduh ka madan, ki jaka khreh ki nongwan ïalehkai, ki jaka leit bar, ki jaka shongkai bad kiwei kaba la pynwandur ruh ïa baroh ka sawdong sawkhun jong katei ka madan ha ka rukom kaba itynnad.
Ha katei ka sngi hashwa ban plie ïa katei ka madan, la ïoh ruh ïa ka jingkyrkhu kyrdoh bad ka jingduwai na u Rev.Fr. Marius Thongni, Parish Priest jong ka St.Peter’s Parish, ha ka jingdonlang ka Kong Bibiana Wahlang bad ki khun ki kti, bad kiwei kiwei.
Ha kane ka sngi na ka liang ka Leonel Futsal Arena lyngba ka Kong Bibiana Wahlang kaba dei ka kmie jong katei ka ïing ka la ioh ban ai sngewbha ruh da ki sopti ïalehkai (jersey) sha ka Pyndengrei Sport Club, kumjuh ruh kum ka dak jong ka jingkynmaw burom ïa u (L) Leonel Marweiñ, la pynlong ruh ka jingsngap jar kaba shi minit. Shuh shuh ha kane ka sngi la ïoh ruh ban ai sngewbha sha kiba la noh synñiang ban pynurlong ïa katei ka kam, kumjuh ruh sha ki riew rangbah kiba la shong thait na ka kam bad kiba la kynjoh sha ka rta kaba 60 snem kiba la wan ban ïalehkai ha kane ka madan.
Ha kane ka sngi u Sordar ka Shnong Pyndengrei u Bah Micheal Marweiñ u la long u kongsan uba la ïoh ruh ban khap ïa u ribon kum ka dak ban plie ïa katei ka madan kumjuh ruh ban ot ïa u cake.
Shuh shuh ha kane ka sngi la donlang ruh u MLA/ MDC ka Nongstoiñ u Bah Gabriel Wahlang, u Bah H. Kerwood Thabah, ADC ka WKH bad kiwei kiwei bad la pynshit pynshngaiñ ïa kane ka sngi da ka jingrwai na ka Kid’s Tarari Choir, ki jingshad bad la ïoh ruh ïa ka jingïalehkai hapdeng ki ophisar jong ka District WKH bad ki dkhot ka EC jong ka Dorbar Shnong Pyndengrei.
