Khliehriat, Nailur 06
U Firsterwell Dkhar u la ïoh Hat-trick bad pynlong ïa ka Khliehriat East YWSC ba kan ïoh jingjop ha ka jingïalehkai 3rd Division Football Tournament ba la pynïaid da ka East Jaiñtia Hills District Football Association (EJHDFA) ha madan Artificial Turf ha Deiñshynrum ha ka 6 tarik Nailur.
Ha ka jingïalehkai, ka Khliehriat East YWSC ka la thep haduh 8-0kol pyrshah ïa ka Moopala SC. U Firsterwell Dkhar marwei u la thep Saw kol ha ka minit kaba 9, 29, 41 bad 61 bynrap sa ki ar tylli ki kol ba la thep da u Pyrshang Sutnga 24 bad 36 kumjuh ki artylli ki kol ba la thep da Nehlang Bareh 31 bad Ijuh Sympli 56.
Shwa kane ka, Umtyra YWSC ka la pynliem da 1-0 kol ïa ka Ïapmala Wahshnong SC bad ïa kane ka kol jong ka Umtyra la thep da u Winison Chyrmang ha ka minit ba 76.
Ha ka jingïalehkai kaba khatduh jong kane ka sngi, ka jingïakhun ka la kut da ka jingïakhaid da mar 1-1 kol hapdeng ka Umrasong SCC bad Nongthymme SC.
Ïa ka kol jong ka Nongthymme SC la thep da u Mewanjop Muksor ha ka minit ba 2 bad ïa ka kol jong ka Umrasong SCC la thep da u Pormi Bareh ha ka 63 minit.
