Shillong, Naitung 13:
U Jorge Jesus u la shah jied kum u coach ba thymmai jong ka Portugal ha ka jingïateh ba saw snem ban ïalehkai sha ka World Cup 2030 bad ka Portugal kan long ka jingïatreilang ban pynlong ïa kane ka lympung. Ka Portugal ka la shah rem noh da 1-0 kol ha ka Spain bad u nongïalam barim u Roberto Martinez u la dep pynbna ba un hiar shuki noh na ka kam kaba u la bat naduh u bnai Kyllalyngkot 2023. U Jesus uba na Portugal, uba la don 71 snem ka rta, u la ïatreilang bad u kapten jong ka kynhun ïalehkai jong ka ri, u Cristiano Ronaldo, ha ka jingïateh kular kaba shisnem jong u, kum u head coach jong ka Al Nassr, bad kitei ki arngut, ki la rah ïa ka nam lahduh jong ka Saudi Pro League, ha ka samoi ïalehkai ba ladep. Hadien ka jingmih noh jong ka Portugal ha ka sngi Nyngkong da ka jingshah rem ha ka World Cup, u Ronaldo u la pynthikna ba kane ka World Cup kan long kaba hynriew bad kaba khatduh jong u, watla um shym la kren eiei shaphang ka jingshongthait pura na ka jingïalehkai ‘international’. Haba kren ha ka sngi Thohdieng, U Jesus u la ong ba une u rangïalehkai ba 41 snem ka rta uba la jop phra sien ïa ka Ballon d’Or, uba ka jingïateh kular jong u bad ka Al Nassr kan neh haduh u snem 2027, u dang long “ka dak jong ka phutbol jong ka Portugal”. U la bynrap, “Katba u dang ïalehkai bad u dang don ha ka jinglong kaba lah ban shah jied, ngan jied ïa u, hapoh ki katto katne ki kyndon bad hapoh ki jinglong kiba nga shim ba ki long kiba bha tam na ka bynta ka kynhun ïalehkai ka ri.”
