Kolkata, Nailur:
Ka kynhun Directorate of Enforcement (ED) ka la pynlong ïa ka jingleit khynra ha ka jaka sah bad ki jaka treikam jong u Principal barim jong ka RG Kar Medical College and Hospital, u Sandip Ghosh, napdeng kiba bun kiwei pat ki jaka ha Kolkata ha kaba ïadei bad ka jingjia jong ka jingpyndonkam bakla ïa ka pisa ha kane ka hospital.
Ka ED hynnin ka sngi ka la leit ban pynlong ïa ka jingkhynra sha kiba bun ki jaka kiba don ha Howrah, Sonarpur bad Hooghly jong ka West Benal ha kaba ïadei bad ka jingkynnoh ba ka la don ka jingklop ïa ka pisa na RG Kar Medical Centre and Hospital.
Ha u bnai Nailar jong une u snem, kawei ka doktor kaba dang don ha ka jingshah pyntibt kaba la 31 snem ka rta ka la shah leh be-ijot bad shah pynïap beiñ ha RG Kar Medical Centre and Hospital, kaba la pynïaid da ka sorkar jylla ha kaba la sakhi ba ki la mih ki jingïakhih pyrshah halor ka jingjia.
Kumba la ïathuh ka tyllong khubor, la ong ba kawei na ki jaka ba kane ka kynhun ka la leit ban khynra ha Hooghly ka kynthup ïa ki jaka treikam bad ki jaka sah jong ki bahaïing jong u Principal barim jong ka RG Kar Medical Centre and Hospital u Dr Sandip Ghosh.
Ha ka taïew ba la lah, ka kynhun ED ka la buh jingmudui pyrshah halor ka jingdon jong ka jingpyndonkam bakla ïa ka pisa ha RG Kar Medical College.
Ïa kane ka mukotduma la mudui ha kaba ïadei bad ka jingmudui ejahar jong ka kynhun Central Bureau of Investigation’s (CBI) ha kaba ka la pynpaw ruh ïa ka kyrteng jong u Dr Ghosh ba u la donkti katkum ka jingtohkti jong ka ha kaba ïadei bad ka jingshah pynïap jong kane ka doktor.
Ha ka jingmudui ejahar, ka kynhun CBI ka la pynngat ha kiba bun ki kyndon ha ryngkat ka kyndon 7 jong ka Prevention of Corruption Act ha kaba ïadei bad ka jingpyndonkam bakla ïa ka pisa ha RG Kar Medical College.
Kumba la pynngat, la ong ba kiba shah kynnoh kim lah ban shah pyllait jamin lada ki shahkem.
Ka tnad ka koit ka khiah jong ka West Bengal, ka la weng kam ïa u Sandip Ghosh ha ka sngi Ba-ar, shi sngi hadien ba ka kynhun CBI ka la kem ïa u; halor ka jingkynnoh ba u la pyndonkam bakla ïa ka pisa-tyngka.
U Ghosh u la shah weng kam 26 sngi hadien ba la lap ïa ka metïap jong ka doktor kaba la shah leh be-ijot bad shah pynïap, napoh ka Seminar Hall jong kane RG Kar Hospital ha ka 9 tarik, Nailar.
“Na ka jingtohkit kaba dang ïaid shakhmat pyrshah ïa u Prof (Dr) Sandip Ghosh uba dei u Principal barim jong ka RG Kar Medical College and Hospital, la pynngat ïa u hapoh ka jingshah weng kam…kaba la treikam mardor,” la ong ka hukum.
Ka Calcutta High Court ha ka 23 tarik, Nailar, ka la hukum ban pynkynriah ïa ka jingtohkit halor ka jingkynnoh ba don ka jingbym pyntreikam hok ïa ka pisa ha RG Kar Hospital na ka kynhun tohkit ba la thung da ka jylla ka Special Investigation Team (SIT) sha ka Central Bureau of Investigation (CBI).
U Ghosh u la bat kum u principal jong ka RG Kar Medical College naduh u bnai Rymphang 2021 haduh u bnai Nailur 2023.
U la shah pynkynriah na RG Kar ha u bnai Risaw jong utei u snem hynrei khlem lah ban batai u la leit phai biang sha katei ka kam tang hapoh shibnai.
U la bat ïa ka kam jong u ha kane ka hospital haduh ka sngi ba la lap ïa ka metïap jong ka doktor.
