Dubai, Nailur:
Katkum ki khubor ba la ioh lum na kylleng ki bynta jong ka Yemen, la shem ba ki jingjia shlei um kiba la ktah jur ia katei ka ri bad kumjuh ruh ka jingkhie ki ‘eriong ha kylleng ki bynta bapher bapher ka la ktah ïa kumba 5,62,000 ngut ki paid nongshong shnong jong ka Yemen ha kine ki taiew ba la dep, la iathuh katkum ka kaiphod ba la ioh na ka International Organization for Migration (IOM) ha ka Sngi Palei, ha kaba ka la pyntip ruh ba katei ka ri ka donkam ia ki jingïarap lane ka jingnoh synñiang kumba $13.3 million namar ka jinghiar ha ka ioh- ka kot ha Yemen.
Namar la ong ba ka jingpynthut jong ki bor ka mariang, kba ym pat ju jia mynno mynno ruh, hynrei ha kane ka por ki la wan lynshop ia katei ka ri kaba duk tam jong ka Arabian Peninsula, kaba la sakhi lypa ia kiba bun ki jingeh.
U Matt Huber uba long u heh jong ka IOM ha Yemen, ha katei ka sngi u la pynpaw ia ka jingsngewkhia kaba jur bad ong ba ka Yemen ka donkam kyrkieh ia ka jingïarap bad ka jingnoh synñiang na kiwei pat ki bor ba nabar namar tang da lade kam lah shuh ban tehlakam ia ki jingeh bad jingkyrduh kiba ka mad ha kane ka sien.
Naba la ong ba, naduh ba kut hi jong une u Naitung ba la leit, u ‘lap-bah uba jur u la ther ia kiba bun ki bynta jong ka Yemen bad kaba la wanrah pat sa ia ki jingjia shlei um ba shyrkhei, kaba la pynjop bad rah ia ki ïing ki sem bad kaba la pynphet sakma ruh ia ki hajar ki longïing, nalor ka jing pynjulor ïa ki jingtei kiba kongsan, kynthup ïa ki jaka sumar, ki skul bad ki surok.
Ha kaba kut jong u bnai ba la dep, u slap uba jur u la wanrah ïa ka jingshlei um ha ka nongbah Mahawit jong ka Yemen, kaba la pynjah rngai ia kumba 40 ngut ki briew na katei ka thaiñ, ia kiba la shu suba bad ngeit ba kim don shuh.
Kumjuh ruh da ki phew tylli ki ïing ki la shah pynjulor ne shah tap bad shah rah ha katei ka jingshlei um ba shyrkhei, kaba la pynlong ia 215 tylli ki longiing ban phet rieh noh sha kiwei pat ki thaiñ kiba kham shngaiñ.
Kumta, la ong ba utei u ‘lapbah bad ki jingshlei um, kim shym la wanrah tang ia ka jingduh nong ne jingjulor hynrei ka la pynduh-pyndam ruh ia baroh ki jingdon-jingem jong kitei ki paidbah nongshong shnong kiba shong ha katei ka nongbah.
