Jerusalem, Naitung:
U Myntri Rangbahduh ka Israel, u Benjamin Netanyahu, u la leit ban jngoh ia ki shipai ka Israel kiba don ha Lebanon ha ka Sngi Ba-ar, ha kaba, u la kular ruh ba ki shipai ka Israel kin dang iai sah ha Lebanon katba ka Hezbollah, kaba ioh jingkyrshan na ka Iran, ka dang buh jingma ia ka Israel.
Kane ka jingkren jong u ka long hadien ba ka Lebanon bad ka Israel ki la ïasoi ïa ka soskular ba la buh lypa hapoh ka jingkyrshan jong ka US ha ka taiew ba la dep ban plie lad ïa ka jingsuk hapdeng jong ki bad ban pynduh tiar ïaleh ïa ka Hezbollah.
Katei ka jingiateh ka pynlong ia kano kano ka jingmih noh jong ka Israel na ki jaka ba la knieh da ka Lebanon, kaba don kyndon ba ka Beirut kan pynduh tiar ia ka Hezbollah da kaba thaw ia ki “pilot zone” kiba ki shipai Lebanon kin shimti.
“Ka nongrim jong ngi ka long kaba shai bha: ngin nym mih na shathie jong ka Lebanon tad haduh ba ka jingma ka la jah noh. Bad katba ka Hezbollah, kaba kieng atiar, ka dang don hangne bad ka dang byrngem ia ngi, ngin iai sah hangne,” ong u Netanyahu katkum ka jingpynbna na ka ophis treikam jongu.
U la bynrap ba “ngi ong ia ka Iran bad ia ka Hezbollah: mih noh na kane ka jaka, phim dei shuh hangne… Ki don ar tylli ki ri kiba synshar hi kiba kwah ban im ha ka jingsuk”.
Ka Hezbollah ka la khring ïa ka Lebanon sha ka thma Middle East ha u Risaw da kaba siat rocket ïa ka Israel, kaba la pynlong ïa ki jinghiar thma liengsuiñ jong ka Israel bad ka jinghiar thma na khyndew.
Ki shipai Israel ki treikam ha ka jaka ba la pynbna hi kum ka “jaka pahara” kaba jrong kumba 10 kilomitar (hynriew mer) shapoh ka jaka jong ka Lebanon ha shilynter u pud u sam.
Ki bor synshar jong ka Lebanon, ki iathuh ba ka jinghiar thma jong ka Israel, naduh ba ka thma, kaba la sdang ha ka 2 tarik u Lber, ka la shim ia kumba 4,200 tam ki briew.
Ha katei kajuh ka por, ki shipai Israel ki la iathuh ba ki don 38ngut ki shipai bad uwei u kontraktor riew paidbah kiba la iap.
