Kyiv, Naitung:
Ka jingleit thombor jong ka Russia ha ka Sngi Palei, ka la shim ïa ka jingim jong 9 ngut ki briew bad da ki phew tam ruh kiba mynsaw hadien ba utei u ‘namding ka Russia u la leit bthei ha katei ka thaiñ ba shong briew ha ka step Sngi Palei. Kane ka la jia ruh tang hadien ba u President ka Ukraine- u Volodymyr Zelensky u la maham lypa ba ka Russia ka dang pyn-ap ban leit thombor dusmon biang ïa ka Ukraine ha kano- kano ka por bym lah tip.
Ka Russia ka la ther bun tylli ki ‘namding bad ka la phah bun tylli ki drone ban leit thombor sha ki nongbah bapher jong ka Ukraine, kynthup ïa ka nongbah Kyiv, hapdeng jong ki bun sien ki jingleit hiar thma ba khah- khah jongka sha Ukraine. La ong ruh ba ka thma Russia bad Ukraine, ka la long kawei na ki thma ba shyrkhei tam ha Europe naduh ki por jong ka thma-bah ba ar.
Kumjuh ruh na ka liang ka tnat ïada jong ka Russia, ha ka Sngi Palei ka la pyn tikna ïa ka jingleit hiar thma ba tyngeh jong ka Russia sha ki katto- katne ki nongbah jong ka Ukraine.
Kane ka jinghiar thma ka long hadien ba ki shipai suiñ jong ka Ukraine ki la maham ba ki namding ballistic ki leit sha ka nongbah bad u Zelensky u la pynlyngkot noh ïa ka jingleit jngoh sha Dublin ha ka Sngi Balang, da kaba kdew ïa ki khubor syntiat jong ka jinghiar thma jong ka Russia kaban sa wan.
Ki nongthoh khubor ha pdeng bad mihngi jong ka Kyiv, ki la ïohsngew ïa palat shispah tylli ki jingbthei bad ki la ïohi ïa ki nongshong shnong – don kiba don ryngkat bad ki khynnah bad ki mrad ba ri, kiba la mareh ban rieh tngen ha ki jaka ieng metro.
Kitei ki jinghiar thma, ki la pyniap ïa 9ngut ki briew bad 34ngut ki la mynsaw, ong ka State Emergency Service jong ka Ukraine.
U khlieh duh jong ka tnat synshar shipai jong ka nongbah, u Tymur Tkachenko, u la pynrem ïa ka jingthmu kaba thmu ban thombor ïa ki riew paidbah bad ki jaka sah briew.
Ki phra tylli ki distrik jong ka thain Kyiv kaba kham heh ki la shah ktah ha katei ka jingshah thombor, ong ka khubor jong u Mykola Kalashnyk, Lat jong ka thain.
“Ha ka por mynmiet, ki nongshun sa shisien ki la hiar thma jur bha ïa ka thaiñ Kyiv da kaba pyndonkam da ki strike drone, ki nam siat bad ki nam siat” ong u Kalashnyk ha ka Telegram.
U la ong ba ki nongtrei ba kyrkieh ki dang ialeh pyrshah ïa ka ding ha ki ïing buh mar bad kawei ka iing ha ka distrik Bucha, katba ki jingshah thombor ki la pynjulor ïa ki iing, ka jaka sah jong ki samla pule bad ki kali ha kiwei pat ki jaka ha katei ka thain.
Katto katne kynta mynshwa, u nongthoh khubor jong ka AFP, u la sakhi ïa ka jingbthei ha pdeng jong ka Kyiv, ha ka por ba pynbthei ïa ki liengsuiñ, bad bud sa ka jingbthei jong ka tdem bad ka thylliej ding. Ki nongpynlip ding bad ki kali kit nongpang ki la don ha katei ka jaka.
Ka jingbthei kaba ar ka la bthei hadien kumba 50 minit eiei hajan ka jaka ba la bthei nyngkong, kaba la phah ïa ki tdem sha suinbneng.
Ki dur ba la pynmih da ki \ ba kyrkieh jong ka Ukraine hadien ba la mih ka sngi, ki pyni ïa ka jingshah pynjulor kaba jur ha kawei ka jaka sah briew, ha kaba kawei ka bynta jong kawei ka iing ka la jah.
Katto katne ki nongshong shnong ki la batai ïa ka jingeh ban sah miet ha ki jaka ri khunswet.
