Jerusalem, Naitung:
U Myntri ïada ri jong ka Israel, u Israel Katz, ha ka Sngi Balang u la ong ba ki shipai ka Israel kin ym mih na Lebanon, Syria bad na Gaza katba ki kam bad jingthmu jong ka Israel kim pat urlong lut.
“Ki shipai IDF kin dang sah ha ki jaka ba la phah kyrpang sha Lebanon, Syria bad Gaza haduh ban da pynmih da kiwei pat ki jingpynbna bad ka Israel ka la leh khnang ïa kane ruh naka bynta ban ïada ïa ki nongshong shnong bad ki shnong ki thaw jong ka Israel na ki lehnoh jihadist,” ong u Israel Katz.
“Ngin nym kynriah noh na ki jaka pahara”, la ong u Katz ha ka jingialang kaba la pynlong kum ka jingburom ïa ki shipai Israel kiba la shah pyniap ha ka thma 2006 ha Lebanon.
U Katz, ula pynpaw biang ïa ka jingmaham kaba kham mynshwa ïa ka Iran, da kaba ong, ba ka ri Islam, kan shah thombor da ka “bor ba pura” lada ka hiar thma ïa ka Israel, halor ki kam jong ka ha Lebanon.
Ka Israel bad ka Lebanon ki la ïasoi ïa ka framework agreement ba la kyrshan da ka US ha ka sngi Palei ban plie lad ïa ka jingsuk hapdeng kine ki ar tylli ki ri bad ban weng ïa ki tiar ïaleh na ka kynhun Hezbollah ba la kyrshan da ka Iran.
Ki heh sorkar jong ka Israel, kynthup ïa u Myntri Rangbahduh ka ri, u Benjamin Netanyahu, ki la kyntait bunsien ïa ka jingweng noh ïa ki shipai na ki bynta ba shatei jong ka Lebanon, ha kaba ki shipai jong ka Israel, ki dang ïai bteng ban ïaleh pyrshah bad ki ehrang Hezbollah.
Ki pynskhem ba kano kano ka jingweng noh ïa ki shipai kan jia tang hadien ba la pynduh tiar ïa ka Hezbollah ha kylleng ka Lebanon.
Ka Hezbollah ka la khring ïa ka Lebanon sha ka thma Middle East ha kaba sdang jong u Risaw da kaba siat rocket ïa ka Israel ban siew kylliang ïa ka jingshah pyniap jong u nongialam ba ha khlieh duh jong ka Iran ha ki jinghiar thma jong ka US-Israel.
Ka Israel ka la jubab da ki jingbthei liengsuin kiba heh bad ka jinghiar thma na khyndew ïa ka thain shatei lam mihngi jong ka Lebanon.
Katkum ka jingkhein jong ka tnat ka koit ka khiah jong ka Lebanon, la iathuh ba haduh 4,300ngut ki briew, ki la iap ha ki jingshah thombor jong ka Israel, naduh ba ka thma, ka la sdang.
Ka tnat shipai jong ka Israel, ka ong ba ka la duh noh ïa 38ngut ki shipai bad uwei u kontraktor riew paidbah ha Lebanon, naduh ba la sdang ka jingialeh, ha kaba sdang jong u Risaw.
Ka Israel ka la pynlong ruh ïa ki jinghiar thma bad jingbthei bom bunsien ha Syria naduh ba la pynhap noh ïa u Bashar al-Assad, uba la synshar slem bha, da kaba ong ba ka thmu ban thaw ïa ka demilitarized zone ha ka thaiñ shathie jong ka ri.
Ha Gaza, ki shipai Israel ki bat haduh 70% na ka jaka.
Baroh ar tylli ki seng Palestine Islamist movement Hamas bad ki shipai Israel ki kynnoh iwei ïa iwei pat ba ki la pynkhein ïa ka jingsangeh iasiat hangtei, kaba la treikam naduh u bnai Risaw jong u snem ba la dep.
