Moscow, Naitung:
Ka tnat kam bar ri jong ka Russia, ha ka Sngi Ba-ar, ka la kyntu ia ka Pakistan ba kan iakren pynbeit noh bad ka Afghanistan ban wanrah ia ka shongsuk- shongsaiñ ha baroh arliang.
Kane ka jingkren jong ka Russia ka long halor ka jingsniew ka jinglong- jingman hapdeng ka Pakistan bad ka Afghanistan ha ki thaiñ khappud.
Ka United Nations ha ka Sngi Nyngkong ka la pynbna ba 28 ngut ki la khlad na katei ka jingiakynad khappud hapdeng ka Afghanistan bad ka Pakistan, ha kaba, ka Pakistan bad Afghanistan ruh ki la nang pynheh shuh shuh ia ka jingdon jong kiba khlad na katei ka jingiakynad khappud.
La ong ba ka Pakistan ka kynnoh ba dei ki kynhun lehnoh jong ka Afghanistan kiba thmu ban leit thombor ia ka Pakistan. Hynrei na ka liang ki bor pyniaid ka Afghanistan ki la kyntait ia katei ka jingkynnoh jong ka Pakistan bad ong ba kane baroh ka dei ka jingeh jong ka Pakistan hi, ba kam shym lah ban tehlakam ia ki jingma kiba wan ban tur ia ka.
