Florida, Naitung:
Katei ka samla 31 snem, la ong ba ka la duh ei noh ïa ka jingim hadien ba ka la shah thombor bad shah patar ha kawei ka kuratia hapoh ka khlaw Little Big Econ State Forest jong ka nongbah Florida, katba ka dang jngi ha ka wah kaba don ha katei ka jaka.
La ong ba ki pulit ki la ioh jingtip lyngba u nombor 911, ha kaba la iohsngew ïa ka jinglynñiar bad jingkhot jingïarap ba shyrkhei ha ka por ba u samla jongka u dang pyntip sha ki pulit halor katei ka jingjia bad katba u dang pyrshang ban ïakhun shitom ban ioh pyllait im ïa ka.
Ia katei ka briew la ithuh kum ka Brittany Clark, bad la ong ba ka dang jngi pyn pyngngad kai ïalade ha ka wah Econlockhatchee ryngkat bad utei u samla jongka- u Chance Allison, ha ka 28 tarik u Jylliew (Sngi U Blei) ha ka por ba katei ka mrad um kuratia, ka la leit ban kynrup ïa katei ka briew bad patar ïa ka kti jongka shiliang.
Katkum ka jingong jong ki nongtohkit, katei ka kuratia ka la ioh tan bad ioh dait ïa ka kti jong ka Clark shwa ba kan tan noh syndon ïa ka shapoh um, ha kaba katei ka mrad ka la ioh tan lang ruh ïa ka Clark bad ïa u Allison shapoh um katba u Allison u dang ïakhun tyngeh ban ioh pynlait im ïa ka Clark.
La ong ba u Allison u la ioh ban pyllait ïa kawei ka kti jong ka Clark, hynrei katei ka kuratia ka la ioh dait sa ïa kawei pat ka shiliang jong ka kti jongka. Ynda u katei ka kuratia ka la pyllait noh ha kaba khatduh, u Allison u la tan ïa ka Clark sharud jong katei ka wah bad u la pyrshang ban leh ïa ka CPR. Hynrei la ong ba ka Clark ka la mynsaw jur bha, na shiliang jong ka kti kaba ka la shah patar pyndkut noh bad kumta ruh ka la khlad noh sydon namar ka jingphlei snam kaba jur katba dang pynkit ïa ka sha hospital.
Hadien katei ka jingshah thombor, ka Florida Fish and Wildlife Conservation Commission (FWC) ka la pynlong ïa ka jingtohkit. Ki briew ka tnat ba dei khmih ïa ki mrad ki la ioh kurup noh ruh ïa ar tylli ki kuratia ba heh na katei ka jaka, uwei u heh 12 phut bad uwei pat u heh 13 phut.
U Weber u la ong ba ki nongtohkit kim shym la lap ïa kano kano ka dak ba don mano mano ba la pynkhihwin ne pynshitom ïa katei ka mrad hadshwa ba kan leit ban thombor lymwir ïa kitei ki shijur ha katei ka jingjia.
Kane ka jingshah thombor kaba shyrkhei ka dei kawei na ki jingjia kiba ïadei bad ki mrad khlaw kiba la ïathuh ha kylleng ka Florida pdeng ha kine ki sngi ba la dep, katba ki heh jong ka tnat khlaw ki dang iai kyntu jur ïa ki paidbah ba kin long husiar ha kylleng ki wah, ki pung bad kiwei kiwei ki jaka um kiba don ha kylleng jong ka ri.
