Venezuela, Naitung:
Ki kynhun pyllait im jong ka Jordan, ha ka Sngi Ba-ar, ki la lap sa ia iwei pat i khyllung hadien 6 sngi jong ki 2 sien khynñiuh jumai ba jur ha Venezuela.
Ia utei u khyllung ba la ithuh kyrteng u Klieber Moran, la ioh tan na kawei ka iingmala kaba don ha Los Corales Garden jong ka thaiñ La Guaira, da ki kynhun pyllait im hadien 6 sngi jong ki 2 tylli ki jumai bah kiba la wan lynshop ia katei ka ri.
Ka Venezuela ka la ioh mad ia 2 tylli ki jumai ba jur ha ka Sngi Balang jong ka taïew ba la dep, ha kaba u jumai ba nyngkong u la pynkhynñiuh ia katei ka ri ha ka jingkhlaiñ kaba 7.2 Magnitude bad uba 7.5 Magnitude ha ka sien kaba ar bad la ong ba baroh 2 sien khynñiuh ki la jia tang hapoh jong ka 1 minit.
Ia u Moran, la rah noh sha jaka sumar naka bynta ban peit-bniah ia ka jinglong- jingman jong ka met jong u hadien ba u la sahkut ha katei ka iingmala ba la twa haduh 6 sngi.
La ong ba ka song jingïarap na ka tnat UNICEF kaba 47 metrik ton, ki mar jingïarap naduh ki marbam haduh ki dawai- dashin, ka la leit poi sha Venezuela ha ka Sngi Ba-ar, la iathuh ka Lamphang jong ka UN- ka Stephane Dujarric, ha kaba, la ong ba kitei ki jingïarap kin long na bynta kito ki khynnah bad ki bahaiing- hasem jongki kiba donkam ia kane ka lad ha kum kane ka por.
Katei ka song jingïarap ka kynthup ia ki tiar sumar, ki dawai, ki tiar pynkha khun, ki tiar sumar ia ki khyllung ba dang shu kha, ki dawai tika ba ju ai ia ki khyllung ba dang kha bad kumjuh ruh kiwei kiwei de ki jingdonkam ba kongsan tam eh.
