Jerusalem, Nailur:
U Myntri Rangbahduh jong ka Israel, u Benjamin Netanyahu, ha ka Sngi Balang u la ong ba ka Hamas ka la kyntait hi dalade ia baroh ki bynta jong ka jingtyrwa ban sangeh thma ha Gaza kaba long ruh ka lad ban pynsuk ia ka jingpyllait ia ki nongshah rahbor. Hynrei u la ong ba ka Israel ka kwah ban ioh wanlam biang noh sha la iing ia kito kiba shah rahbor baroh.
Nangta, u Netanyahu u la ong ba ka Israel haduh mynta-mynne ka dang pyrshang ban wad lad ia ka jingiakren iasuk noh bad ka Hamas bad ka dang peit-thuh ruh ia ka jaka kaba biang ban ioh iakynduh markhmat bad ban pynkut noh ia ka thma. Ha kawei pat ka liang u la ong ba dei ka Hamas hi pat kaba la kyntait hi dalade ia ka jingiakren iasuk ha kane ka por bad ka la dep pynbna ba kam donkam shuh ban iakren iasuk hynrei dei ban pyndep bad ban bteng ia ka jing-iakhun haduh kaba kut.
Namar la ong ba u Netanyahu u la nang shah pynbor shuh-shuh ha ki ri bapher-bapher ban pynskhem ïa ka jingïateh kular ka ban sangeh thma noh bad kumjuh ruh na ka liang ki paidbah jong ka Israel pat ki la dawa ia utei u nongialam ba u dei ban ialeh shitom ban ioh pyllait noh ïa kito kiba shah rahbor baroh bad kiba dang don ha ka kti ki lehnoh Hamas haduh kane ka kynti.
Ha ka sngi Nyngkong, u Netanyahu u la ong ba ki shipai Israel kin dang bat ia ka jingsynshar ha ki thaiñ khappud Philadelphi kaba don ha khappud Egypt-Gaza da kaba byrngem ruh ba ka Israel kan ym ailad ne pynsngap ia kitei ki jingpynbor lada ka Hamas hi kam kwah ban iasuk.
Ka Hamas, kaba ka jinghiar thma kaba khlem pat ju jia mynno mynno ruh ha ka 7 tarik u Risaw, ka la leit hiar thma sha ki bynta ba Shathie jong ka Israel. Hynrei ha kane ka por, ka Hamas ka la dawa ia ka Israel ba kan phah mih noh shi syndon ia ki shipai jongka baroh na katei ka nongbah lada ka kwah ban pyndep bad pyn-urlong ia ka jingïakren kaba la sah-teng bad kaba la pyrshang shitom ban pyn urlong da ka jingiatrei lang jong ka United States, ka Qatar bad ka Egypt.
Kumta, la ong ba ha ka jingiakren bad ki lad pathai khubor ha ka Sngi Balang, u Netanyahu u la pynpaw biang ia ka nongrim jong u halor ka Philadelphi Corridor, da kaba ong ba ka jingailad ia ka Hamas ban synshar hi biang ia ka nongbah Gaza, kan nang plie lad bad nang ai mynsiem ia ka Hamas ba kan nang pynkhlaiñ shuh-shuh ialade khnang ba kan ioh ban leit thombor biang ha ki por ki ban wan.
Hynrei, ki ri jong ka pyrthei ki la kyntu ia ka Israel ba ka dei ban pynjem ialade shipor, naka bynta katei ka jingiakren iasuk bad ka Hamas, khnang ba ki kam bad jingthmu baroh kin long kiba jop kumba la pynbeit. Hynrei, u Netanyahu u la ong ba ka Israel kan ym pynjem bad kan ym pyndem da lei-lei ruh hynrei kan leh ia kaba donkam naka bynta ka hok jong ki paidbah nongshong shnong jongka bad baroh ki rai jong ka Israel ha kane ka por, kan shong ruh ha ka jingleh jong ka Hamas. Namar lada ka Hamas ka kwah ban iasuk shisha, ka Israel ruh ka kloi ban iasuk hynrei ka Hamas kan hap ban pyllait noh shuwa ia baroh kito kiba ka la dep rah-bor baroh shi katta shapoh ka nongbah Gaza.
