Washington, Nailur:
Ka Kamala Harris, ka kyrtong President jong ka seng Democratic, ka la kyrpad ïa ki nong America, ba kin ai jingkyrshan ia ka lada ki kwah ban pynsangeh noh ïa ka “khlam jong ka jingshah thombor da ki suloi” kaba la ktah jur ïa ka ri America ha kine ki sngi. Kane ka jingkren jong ka Harris ka long hadien ka jingshah synreit kuli naphang jong kawei ka skul heh ha ka nongbah Georgia kaba la shim ia ka jingim jong 4 ngut ki mynsiem ba lui-lui.
Kumta, la ong ba katei ka Vice- President jong ka US, haba kren ha ka jingïalang ha New Hampshire, ka la pynsngew biang ruh ïa ka jingkhot jong ka ban khang ïa ki tiar siat, kaba long ka mat ba la pyrshah jur da ki nongialam bad dkhot jong ka Republican bad ka Harris ka la dawa ruh ba dei ban pynkhlaiñ shuh-shuh ïa ki aiñ ïada suloi jong ka US.
Ka Harris ka la pynpaw ruh ia ka jingsngewkhia halor kaei kaba la jia ha katei ka skul bad ong ba kane ka long ka jingjia ba sngewsih kaba khlem jingmut bad ka bym shym la dei ban jia ne urlong lada ki bor pynïaid ka ri ki la shim khia ban pyntreikam ia ki kyndon bad ki aiñ ban tehlakam ia kine ki jingjia naduh ki por ba la leit. Ka Harris ka la ong kren ruh shaphang ka jingsynreit kuli ha Apalachee High School ha Winder kaba don hapoh ka nongbah Georgia bad kaba dang shu dep jia shen ha kane hi ka taiew, ba ka long ka jingpynhiar mynsiem kaba khatduh eh jong ka jingshah thombor da ki suloi ban ktah ïa ka ri US kaba la sakhi ia ki spah tylli ki jingshah siat paidbah wat tang hapoh jong une u snem 2024 marwei.
Kumta, katei ka nongialam ka la pynpaw ia ka jingsngewkhia kaba jur, da kaba pynskhem ruh ba ka long kaba kongsan haduh katta ban pynkut noh ia katei ka khlam jong ka jingshah thombor da ki suloi hapoh ka ri bad na ka bynta ka bha- ka miat bad ka jingshngaiñ bad kumjuh ruh ka shongsuk- shongsaiñ jong baroh lang.
Ka Harris, kaba ju long ka nongmudui bad ka nongïasaid aiñ jong ka California bad ka long ruh ka nongïasaid aiñ barim jong ka US, ka la khot ïa ka Congress ban shim ia ka rai ba kyrkieh bad kaba khatduh ban mynjur ïa ka jingkhang bad jingpyrkhing noh ia ki tiar siat hapoh katei ka nongbah bad kumjuh ruh ha ka ri baroh kawei, naka bynta ka jingshngaiñ jong ki paidbah ka ri.
