Port Sudan, Nailur:
Ki bor pynïaid ka Sudan ha ka Sngi U Blei ki la pyntip ba 21 ngut ki paidbah ki la khlad bad 67 ngut ki la mynsaw hadien ka jingjia synreit kuli ha kawei ka iew hapoh ka thaiñ Sennar sha ka phang Shatei Lammihngi jong ka Sudan .
Ka Sudan Doctors Network kaba la seng hadien ba la sdang ka thma ha u Iaiong jong u snem 2023 ha kaba la sakhi ia kum kane hi kajuh ka jingjia, hynrei la ong ba ka jingdon jong kiba mynsaw ka la long palat 70 ngut. Ha katei ka por la pharep ba dei ka jingthombor jong ka Rapid Support Forces (RSF). Katei ka RSF, kaba la ialam da u Mohamed Hamdan Daglo, ka iakhun pyrshah ia ki shipai jong ka Sudan hapoh ka jingialam jong u nongsynshar katei ka ri- u Abdel Fattah al-Burhan.
Kumta, la ong ba ka sorkar ha kitei ki por ruh, ka la kynnoh ia ki shipai RSF ba ki thmu ban pynsajia bad wanrah jingeh ia ki riew paidbah bad ban pynjulor bad pynthud ruh ia ki jaka treikam jong ki riew paidbah.
