Shillong, Nailur 10:
Ka Big FM’s Big Futsal Fest ka la sdang mynta ka sngi da katto-katne ki jingïalehkai kiba la thep kol bha kiba la pynhun ïa ki nongpeitkai.
La khot ïa kane ka jingïalehkai futsal hapdeng ki ophis ba nyngkong eh jong ka Shillong, ïa kane ka jingïalehkai la ïalehkai da ki kynhun ophis sorkar bad ki kynhun ophis jong ki kompani. Ha kane ka sngi la don lang u Myntri ka tnad Sports & Youth Affairs u Bah Shakliar Warjri bad u Myntri ka kynhun Myntri u Bah Alexander L Hek.
Ha kane sngi plie la pynlong saw tylli ki jingïalehkai. Ka NEEPCO ka la pynliem ïa ka ITI Shillong da 7-2 kol ha kaba u David Kurkalang u la thep saw kol na ka bynta ka kynhun ba la jop. Ka kynhun ïalehkai ba la leh bha ka AG Meghalaya ka la pynliem da kaba suk ïa ka Banalari Motors da 4-1 kol katba ka MeECL ka la pynliem ïa ka SP’s Office, East Khasi Hills da 7-6 kol ha ka jingïakhun kaba itynnad tam ha kane ka sngi. Ka jingïakhun kaba khatduh ka long hapdeng ka tnad PHE bad ka MUDA, ha kaba ka kynhun barim ka la jop da 7-3 kol.
Ki don 16 tylli ki kynhun ophis kiba ïashim bynta ha kane ka lympung knockout, kaba long ha Langkyrding hangne. Ka phainal kan long ha ka 14 tarik Naiwieng.
