Seoul, Nailur:
Ka South Korea ha ka Sngi Palei ka la pyntip ba ka North Korea ka la ther ‘namding biang sha ki bynta jong ka duriaw kaba don sha ka phang Mihngi tang hadien katto-katne sngi ba ka North Korea ka la rakhe ia ka jingdap snem.
U heh ka tnat ïada jong ka South Korea ha katei ka step u la pyntip ba ka South Korea ka la iohi ia bun tylli ki ‘namding ‘Short Range Ballistic Missile’ kiba la pynher da ka North Korea ha ka por kumba 7 baje mynstep sha ki bynta Mihngi jong ka duriaw.
Kumta na ka liang ka South Korea ka dang wad jingtip bniah ruh halor kitei ki jingpynher ‘namding khah-khah jong ka North Korea bad ban ioh iamir jingmut ruh bad ka US bad Japan khnang ba ka jing-leh jong ka North Korea kan ym buh jingma ia kine ki ri marjan.
Kumjuh ruh na ka liang ka tnat ïada ri jong ka Japan, ka la pyntip ba ha katei ka step ka la iohi ia uwei u ‘namding ba la pynher da ka North Korea bad la maham ia ka North Korea ba katei ka jingpynher ‘namding jongka, kam dei pat ban pynthud ne ktah ia ri Japan.
Namar la ong ba ka North Korea ka la shu pynher ‘namding naduh katei ka 9 tarik u Nailur shuwa ka sngi dap snem jong ka bad ka la pynher ia ki ‘namding kiba ka shna hi dalade kumba ka la leh ha u snem 2016 ha ka sngi dap snem jongka hi.
Ka sien pyrshang pynher ‘namding ‘nuclear’ ba 6 jongka, ka la long ha ka 3 tarik u Nailur jong u snem 2017.
Haba iadei bad kane, u nongialam ka North Korea, u Kim Jong Un haba ai jingkren ha ka sngi ba rakhe ia ka jingdap snem ba 76 jong katei ka ri, u la ong ba ka North Korea mynta kan ialeh ban pynkhlaiñ ha ka liang ka jingpynmih ia ki tiar ‘nuclear’ naka bynta ka jingshngaiñ bad jingkhlaiñ jong ka ri bad khamtam eh ban ïada ialade na ki jingma kiba ap na ki nongshun jong ka.
