I. R. Dkhar
Dang ha kine ki khyndiat sngi ba la dep, ka Seng ki Nongñiah Tourist Taxi ba la tip kum ka All Khasi Meghalaya Tourist Taxi Association (AKMTTA), ki la pynlong ïa ka jingïakhih da kaba sieh lama iong ha ki Taxi jong ki kum ka dak jong ka jingïakhih ban pynpaw ïa ka jingpyrshah jong ki ïa ki Tourist Taxi kiba wan kamai kajih nabar ka Jylla ban wan kamai sahuh ha kane ka Jylla jong ngi. Kane ka jingïakhih ka la sdang ha ka 9 tarik u Nailur, 2024 bad kan kut ha ka 14 tarik u Nailur, 2024 (Nongsain Hima 12/9). Ha kawei ka liang lada pyrkhat, ka long kaba sngewdei ba kane ka Seng ki Nongñiah Tourist jong ka Jylla Meghalaya kin pynpaw shabar, ïa ka Sorkar bad ïa ka pyrthei baroh kawei, namar la ong ba ka pynduh kamai ïa ki. Hynrei lada pyrkhat jngai ïa kane ka jingïakhih kan wanrah pynban ïa ka jing-ktah jong kiwei pat ki Nongñiah Tourist Taxi kiba nabar. Te namarkata, donkam ban don ka jingpyrkhat jngai bad sani bha da ka jingïamir jingmut lang jong baroh ki Nongñiah Tourist Taxi jong kane ka Jylla kumno ban leh ioh ka ktah ïa ka jingsngew pyrshah jong kiwei pat. Shisien pyrkhat ka long kaba sngewdei, hynrei kane ka jingpyrshah ka long ka jingpyrkhat khynnah-khyllung ym kum ki rangbah briew. Baroh ka pyrthei kim pyrshah ïa kiwei pat ki Tourist Taxi ban ïaid kamai, ki lah ban kamai sha kano kano ka Jylla katkum ka permit jong ki, hynrei dei tang hangne hapoh Meghalaya ba ka don ka jingpyrshah. Kan jia aiu lada ki Tourist Taxi nangne napoh Meghalaya, kiba don ïa ka Meghalaya Registration, kin leit ne ki ioh kamai sha Assam, Nagaland, Manipur ne Arunachal Pradesh ne sha kano kano ka bynta jong ka Northeast ? Lada kin ioh passenger nangne napoh Meghalaya ban leit sha kiwei pat ki Jylla, lada don ka jingpyrshah, kan jia aiu ïa ki? Namarkata kane ka jingïakhih jong ka AKMTTA ka long thik kum ka jingpyrkhat ñiangkuhiw, ïalade ruh kim kamai, ïa kiwei ruh kim ailad. Kaba donkam ka dei ban trei shitom ban nang ne ban sian kumno ban kamai kajih hapoh la ka jylla la jong ban ioh ïa ki lad ki lynti hapoh bad shabar ban im ka kamai kajih khnang ba kiwei ruh kim iohlad.
U Bah Paul Lyngdoh, Myntri Tourism u la dep pynbna lypa ba ka Jylla kan nym don kano kano ka jingpyrshah namar u tip ba ioh kan ktah pat ïa ki Tourist Taxi kiba na kane ka Jylla kin leit kamai sha kiwei pat ki Jylla. Tip kan jia aiu lada kane ka jingpyrshah jong ki Nongñiah Tourist Taxi kin ai ka jubab ïa u Bah Paul ha ka 14 tarik u Nailur, 2024 kumba ki ong ha ki Kotkhubor. Ngi kum ki nongshongshnong bad paidbynriew jong ka Jylla Meghalaya, ngim kwah ban don kano kano ka huri hura, ka jingiakhih kaba eh bad ktah ïa ka jingshongsuk shongsaiñ tang na kane ka kam. Ai ba kan don ka jingpyrkhat rangbah bad ka jingpyrkhat jngai jong ki Nongñiah Tourist Taxi jong kane ka Jylla. Ngi kwah ban iohi ba kita ki Nongñiah Tourist Taxi kin long ki briew kiba trei shitom, kiba smat basting khnang ba kin ioh ïa ka ja ka dohkha ban pynbit biang ïa ki khun ki kti, ïa ka ïing ka sem bad ïa ka imlang sahlang bad ruh ban pyni ïa ka nuksa ïa kiwei pat khamtam ïa kiwei pat ki samla samhoi ha kane ka Jylla jong ngi.
