Shillong, Nailur 16
Hadien ka jingshah jied ban leit shah pyntbit sha ki shlem ai jinghikai phutbol jong ka ri India kiba don ha Germany bad Austria, u Banpliebok Khongjoh u la pynpaw ïa ka jingkhmih lynti ba un nang trei shitom shuh shuh ha shwa ba un leit sha Germany.
Une u rangïalehkai u la ïoh ïa ka nam Best Player ha ka final jong ka Subroto Cup International Football Tournament 2024 kaba la kut dangshen ha nongbah Delhi hadien u la lah ban thep kol ha ka penalty. Hynrei ha kaba kut jong ka jingïalehkai ka kynhun ïalehkai Under-17 jong ka Mynken Christian Higher Secondary School ka la mad ïa ka jingshah rem lyngba ka tie-breaker ha ka T.G English School kaba na Manipur lyngba ka jingïashut tie- breaker da 4-3 kol.
U Banpliebok uba dangshong klas-IX, u la pynpaw ïa ka jingsngewkmen eh ban shah jied namar ka dei ka sien kaba nyngkong eh ha ka jjngim jong u. “Nga da sngewkmen eh halor kane ka jingshah jied namar ka dei ka sien kaba nyngkong eh ïa nga ban ïoh ïa kum kane ka lad ban leit shah pyntbit, hynrei nga jingkhmih lynti ba ngan dang ïai trei shitom nangne shakhmat wat la nga dang hap ban ap ïa ka por ban ïoh leit sha Germany,” la pynpaw utei u rangïalehkai haba ïakren bad ki nongthoh khubor hadien ba u la wanphai sha la ïing ha ka 13 tarik mynta u bnai.
Wat la ka rta ïalehkai jong u ha ka Subroto Cup ka la poi sha kaba kut, hynrei kaba kham sngewtynnad ka long ba utei u rangïalehkai uba na Nongpoh RiBhoi District, u la dep pynïasoh lypa ruh sha ka Shillong Lajong Football Club namar u donkam ban ïoh shuh shuh ka jingshah hikai kaba paka khnang ba un nang san ha ka kam ïalehkai bad ban saiñdur ïa ka kawei ka jong u.
Kum ban pynkynmaw ka Mynken CHSS ka la wanphai sha la ïing ha ka 13 tarik ha kaba la pdiang sngewbha da ka Sports Cell jong ka seng Khasi Student Union bad kiwei.
