Shillong, Nailur 17
Ka kynhun ki Technical Official jong ka Athletic Federation of India (AFI) kin wanpoi sha kane ka nongbah ha ka Sngi Palei na ka bynta ban khmih bniah ïa ka jingpynkhreh jong ka 3rd Sohra International Half Marathon 2024.
Kane ka jingwan jngoh jong ka AFI ka long ruh ban khmih bniah ïa ka jingpynbeit ïa ka lynti ban ïamareh jong ka 21k kaba sdang na Laitsohpliah haduh Mawsmai ha ka surok bah Sohra. Kane ka marathon kan long ha ka Sngi Saitjaiñ (21 tarik) ka ban sdang naduh ka por 6 baje haduh 10 baje mynstep.
La pyntip ruh ba ki nongïashim bynta kiba la pynrung kyrteng lyngba ka online na ka bynta 21K bad 10K, ïa ka bib number bad ki T-Shirt yn sam ha ka 19 bad 20 tarik naduh ka por 10 baje mynstep haduh ka por 4 baje janmiet ha ryngkat ka jingpynshisha ba ki la dep pynrung kyrteng ïalade bad ruh kin hap ban wanrah lang ïa ki xerox copy jong ki ID ha JN Stadium kaba ha madan Polo, Shillong.
Ka jingkaweh lama na ka bynta ka 5K Run kan long ha ka por 6:30 mynstep da u Bah Gavin Mylliem, MLA & Adviser ka Meghalaya Health Advisory Board jong ka Sorkar Jylla, katba ïa ka 10K yn sdang ha ka por 6:45 mynstep ha kaba yn kaweh lama da ka Kong Isawanda Laloo (IAS), Secretary ka tnat ïalehkai, bad ïa ka 21K yn sdang ha ka por 7 baje ka ban kaweh lama da u Dr. Vijay Kumar D, (IAS), Commissioner & Secretary ka tnat ïalehkai jong ka Sorkar Jylla.
Kat kum ka kyrwoh ba la pyllait da u General Secretary ka MSOA u Bah Finely L. Pariat, u la pyntip ba ki bus ki ban kit ïa ki nongmareh kin mih na ka nongbah ha ka por 4:30 mynstep.
Kum ban pynkynmaw ba ki la don palat 7000 ngut ki nongmareh kiba la dep pynrung kyrteng ïalade lyngba ka ‘online’ bad ‘offline’ kynthup ïa 7 ngut ki nongmareh ki ban wan nabar ri kita 3 ngut na Kenya, 2 ngut na Ethiopia bad 2 ngut na Bangladesh. Kane ka jingïakob mareh kaba hap hapoh ka jingkhmih da ka Athletics Federation of India, yn pynlong da ka Meghalaya Athletics Association, ka MSOA ha ryngkat ka jingkyrshan lang da ka tnat ïalehkai jong ka Sorkar Jylla.
Ki kyrdan mareh ha kane ka jingïakob ki kynthup ïa ka 21K Elite Open (above 18yrs), ka 21K Open (above 18yrs), 10K Open (40yrs to below 50yrs), 10K Open (50yrs to below 60yrs) bad ka 5K Ru nFor Fund na ka bynta ki kynthei bad shynrang.
Ka jingpynlut ha kane ka marathon kan long T. 2 klur 3 lak tyngka bad la pynkhreh ruh ïa ki khusnam na ka bynta baroh ki nongjop ha la ki jong ki jong kyrdan ïakob.
