Shillong, Nailur 18
Ka Meghalaya Football Association (MFA), ka la ai khublei kitbok kitrwiang bad pynpaw rung ka jingsarong hadien ba kawei na ki samla rephri kynthei ka Ri-ïohlang Dhar ka la shah jied ban ïadon bynta ha ban pynïaid ïa ka lympung ïalehkai jong ka FIFA Women’s Under-17 World Cup
Ka Ri-iohlang kaba trei ha 1st MLP Bn kaba don ha kane ka nongbah Shillong, ka la long tang marwei napoh ri India ba ïoh ïa kum kane ka kabu ksiar ban don bynta ha ka ban pynïaid ha katei ka lympung.
Haba ïadei bad kane, ka MFA ka la ai burom ïa ka da kaba pynkup da ka jaiñ thohrew stem bad ryngkat ka song pisa T.25,000.
Ïa kane la aiti sha ka Riïohlang ha ka sngi Balang ha ka shlem treikam jong ka MFA kaba don ha JN Stadium Polo, ha kaba la don lang u President bad Secretary ka MFA u Bah Hamletson Dohling bad u Bah Sunesh Syiem, bad ki dkhot nongkitkam ki jong ka.
Na ka liang u Bah Hamletson haba pynpaw ha kane ka jingïalang u pynpaw ba u dap da ka jingkmen kaba khraw ïa ka MFA, ïa ki paidbah ka jylla bad ïa ka ri hi baroh kawei ha kaba kawei ka riew kynthei ka la ïoh ka lad ban mihkhmat ïa ka ri sha katei ka lympung.
Katba u Bah Sunesh Syiem u ñiew bad shim ba kane ka dei shisha kawei na ki kam kiba da radbah, bad pynpaw ba kum ka synjuk kam da don than eh eiei ba kan ai, hynrei tang ka jingkitbok kitrwiang ïa ka Riïohlang ba kan lah ban pyndep ïa la ka jong ka kamra kumba ka la shah jied.
