Jowai, Naiwieng 04
Ki san ngut ki dkhot ka Games Technical Conduct Committee (GTCC) jong ka Indian Olympic Association (IOA) ha ka sngi Balang ki la hiar sha West Jaiñtia Hills District ban jurip bniah ïa ki madan ïalehkai kiba long shi bynta ka jingpynkhreh ïa ka 39th National Games ha u snem ban wan ha kane ka Jylla.
Kane la wan hadien shi sngi ba kane ka kynhun ka la pynlong ka jingjurip nyngkong ïa ki jaka ïalehkai kiba don ha kylleng ka nongbah Shillong.
Kane ka kynhun ka la hiar jurip nyngkong ïa ka Multi Sports Complex kaba ha Wahïajer na ka bynta ki jingïalehkai Lawn Bowls bad ka Kiang Nangbah Stadium na ka bynta ban pynlong ïa ka jingïalehkai Muay Thai bad Judo.
Ïa kane ka kynhun la ïalam da ka Sunaina Kumari, Chairperson ka GTCC, ha ka jingsynrang lang da ki dkhot ka GTCC kynthup u Ravinder Choudhary, u Maninder Pal Singh, u V. Sunil Kumar, bad u Dushyant Sharma.
Ha kane ka sngi la ïadonlang ruh ki nongmihkhmat na ka Meghalaya State Olympic Association, kiba kynthup ïa u Working President Bah John F. Kharshiing, Vice President Kong Matsiewdor War Nongbri, General Secretary Bah Finely Lad Pariat, u Deputy Director Bah Païa B. War Nongbri, bad u Chief Engineer ka State Council Mehalaya Bah Pharngki Pale.
Nalor kata la don lang ruh ki dkhot na ka Muay Thai bad ki nongmihkhmat jong ka Judo, kumjuh ki katto katne ngut ki ophisar ka West Jaiñtia Hills District, ki nongmihkhmat na ka ophis jong u Deputy Commissioner, District Sports Officer, ka WJDSA, bad kiwei kiwei.
