Shillong, Naiwieng 04
Ka Shillong Lajong FC kan pynkhreh ïa ka jingïalehkai kaba nyngkong eh ha la ïing na ka bynta ka lympung ïalehkai Indian Football League 2026-27 pyrshah ïa ka Chanmari FC kaba na Mizoram, ha ka sngi Thohdieng.
Ïa kane ka jingïalehkai yn pynlong ha SSA Stadium ha Polo ha ka por 6:30 janmiet.
Ha kane ka lympung ïalehkai mynta ka aïom ki don 11 tylli ki kynhun ki ban mihkhmat na la ki jong ki jylla jong ka ri. Nalor ka Shillong Lajong bad ka Chanmari, kiwei pat ki kynhun ki long ka Mohammedan Sporting Club, Dempo SC, Gokulam Kerala FC, Real Kashmir FC, Rajasthan United FC, Sreenidi Deccan FC, FC Bengaluru United, Nagaland United SC bad ka Samaleswari SC.
Hadien ba ka la wan ha ka kyrdan ba-ar ha ka aïom ba la lah, ka Lajong ka la khmih lynti ban ïalehkai bha ha kane ka lympung na ka bynta ban kynjoh sha ka kyrdan ba hakhlieh.
Kane ka kynhun ïalehkai ka nongbah ka la sdang ïa ka jingïalehkai kaba nyngkong shabar na la ïing, ha ka sngi Saitjaiñ jong ka taïew ba la lah ha kaba ka la pynliem noh ïa ka Mohammedan SC da 1-0 kol ha Kalyani Stadium bad ïa kawei ka shi kol la thep da u rangïalehkai shongben u Nelson Rymbai ha ka minit kaba 90 na ka bynta ban khur ïa ki lai poiñ.
Kane ka kynhun ka la pynkhreh ïa ki prokram kilanmet naduh ba ka la wanphai sha kane ka nongbah, te kumta kane ka kynhun ka donkam ïa ki paidbah nongkyrshan ki ban pyndap ha katei ka stadium bad ban ai mynsiem ïa ka.
Na ka bynta kane ka jingïalehkai ha la ïing, ka Shillong Lajong ka la pynbna ba kan die ïa ki tiket naduh mynta ka sngi Palei na Electronic Centre (Police Baazar), Café Shillong (Laitumkhrah) bad na SSA Stadium Ticket Counter (Polo Ground). Ki dor jong ki tiket kin sdang naduh T. 100. T.500 (VVIP), T.300 (VIP),T. 300 (North East Stand),T. 150 (East Stand), T. 100 (West Stand) bad T. 100 (North West Stand).
