Washington, Nailur:
U Myntri ïada Ri jong ka Israel, u Yoav Gallant, ha ka Sngi Balang u la iathuh ba ka Israel ka la rung sha ka “bynta kaba thymmai” jong ka jingialeh pyrshah ia ka kynhun lehnoh Hezbollah jong ka Lebanon, hadien ar sngi lynter jong ka jing pynbthei bom jong ka Israel ha Lebanon.
Haba ai jingkren ha ka tnat liengsuiñ jong ki shipai ha ka thaiñ Shatei Lam Mihngi jong ka Israel ha ka Sngi Balang, u Gallant u la ong ba ka Israel ka la phai sha ka phang Mihngi da ban khmih bniah ia ka jingdon ki marpoh khyndew, ka bor ding, bad kiwei de ki bor kiba ai jingkyrshan ia ka ioh-ka kot jong ka Israel.
Kumta, ha katei ka sngi, utei u nongialam u la ong ruh ba ka Israel mynta ka la sdang ban iakynad sa bad katei kawei pat ka kynhun lehnoh jong kawei pat ka ri. Ban poi sha ka thong jong kane, ka Israel bad ki shipai ïada jong ka ki dei ban long kiba shlur bad kiba kloi ban len lade na ka bynta ka hok jong ka ri bad ka jaitbynriew, khamtam eh ban ioh pynpoi iing biang ia ki paidbah nongshong shnong jong ki shnong ba Shatei Lam Mihngi sha ki ïing ki sem jong ki da kaba suk.
Kane ka jingpynbna ka long hadien shi sngi ba ka Security Cabinet jong u Benjamin Netanyahu, ka la rai ban pyniar ïa ki jingthmu jong ka jingïakynad da kaba thmu ban wanlam biang ïa ki nong Israel kiba la shah pynkynriah jaka bad kiba la poi sakma noh na shiliang sha shiliang khappud jong ka Lebanon namar ka jingiakynad hapdeng ki lehnoh Hezbollah bad ki shipai Israel ha ki por ba la leit.
U Gallant u la iaroh ia ka jingkiew jong ki shipai hynrei um shym la kren eiei halor ka jingkynnoh ba ka Israel ka don bynta ha ki jingthombor ba dang shen ha Lebanon.
Ki heh sorkar Lebanon, ki la iathuh ba da ki hajar tylli ki ‘Pager’ lane ki tiar iakren bad ki radio ba shu bat ha kti, ki la bthei ha kine ki ar sngi mynta, ha kaba kane ka la shim ia ka jingim jong 21 ngut ki briew, kynthup ia ki khynnah bad palat 3,000 ngut kiwei pat kiba la mynsaw ei ha katei ka jingjia, kaba ka Hezbollah ka la pharep pyrshah ia ka Israel.
