Berlin, Nailur:
Katkum ki khubor, la ong ba ki bor pynïaid ka Germany ha kane ka por ki la pyrkhing bad pynkut noh ia ka jingshalan tiar thma sha ka Israel katba ka dang ialeh ia ki jingeh ha ka liang ka aiñ. Namar la ong ba ka jingleh jong ka Israel ka la long sha ba palat bad kam kheiñ shuh ia ki mynsiem briew jong kano- kano ruh ka ri hynrei ka la shu pyni bor khlem jing-isynei wat ban shim dusmon ia ki mynsiem ba lui-lui kiba don ha kito ki ri kiba ka Israel ka buh shun.
Katkum ka jingiakut hapdeng ka Germany bad Israel ha u snem ba la leit, ka Germany ka la mynjur ban shalan ia ki tiar ialeh sha Israel, ka ban shongdor haduh 326.5 Million Euro ($363.5 million), kynthup ia ki tiar shipai bad ki tiar ialeh thma, kaba pynkiew da 10 shah ia kaba la long hapoh jong u snem 2022 bad kane ka long ruh katkum ka jingai jingkheiñ jong ka Economy Ministry, kaba mynjur ia ki laisen shalan ia ki tiar thma shabar ri.
Hynrei la ong ba ka Germany ha une u Nailur ka la phai dien bad kylla ktien noh da kaba ong ba naduh ba sdang jong une u snem ruh, ka Germany ka la shalan tang kumba 14.5 Million Euro bad ha kane ka sien lei ka Germany ka la pynbna ba kan pynkut noh syndon ia ka jingshalan tiar thma sha Israel.
Kumta ha kane ka kynti, la ong ba utei u heh sorkar ka Germany u la ong ba ka Sorkar Germany ha kane ka por ka la rai ban sangeh noh ia ka jingtrei ban mynjur ia ki laisen shalan ia ki tiar thma sha Israel katba dang ap ia ka jingpynbeit ia ki mukotduma aiñ da kaba kdew ruh ba kum kine ki jingshalan na Germany ki pynkheiñ ia ka aiñ jong ka jinglong briew namar ka jingpyndonkam jong ka Israel ia kitei ki tiar thma ha ka jingleit thombor jongka ia kiwei pat ki ri.
Ha ka jingïada jong ki ar tylli ki mukotduma, kawei hakhmat ka International Court of Justice bad kawei pat ha Berlin kaba la wanrah da ka European Centre for Constitutional and Human Rights (ECCHR), ka sorkar ka la ong ba ym shym la don kino kino ki tiar ialeh thma kiba la shalan shabar ri hapoh kano kano ka laisen kaba la ai naduh ka 7 tarik u Lber ba ka Hamas ka la leit ban hiar thma ia ka Israel bad ka Israel ruh ka la pynbna da ka thma bad ka kput pyrshah ia katei ka kynhun lehnoh kaba la synshar hi ia ka nongbah Gaza da ki phew snem.
Haba iadei bad kane, la ong ba ka jingleit hiar thma jong ka Israel ïa ka Gaza, ka la shim ïa palat 41,000 ngut ki mynsiem briew kiba long ki nong Palestine kiba shong-sah hapoh ka nongbah Gaza Strip.
