Shenzhen, Nailur:
Uwei u khynnah na Japan ba pule ha kawei ka skul ha ka nongbah Shenzhen jong ka China, u la khlad noh hadien ba u la shah shoh dusmon ha u runar ha ka Sngi Balang. Ia kane la pyntikna da ki bor pynïaid ha ka Sngi Palei bad ka dei ruh ka sien ba ar kum kane ka jingshah thombor ba la sakhi ha ki jaka pule jong ki nong Japan ha China.
Ki bor pynïaid ka China ki iathuh ba utei u khynnah, 10 snem ka rta, u dei u nong Japan, ha kaba u kpa jong u dei u nong Japan bad ka kmie pat ka dei ka nong China. Utei u khynnah u la shah pyniap ha ka por ba u dang ïaid lynti ban leit sha skul ha ka por kumba 8 baje mynstep jong katei ka sngi. Ia kane ka kam la suba ba la leh da uwei u runar uba la don 44 snem ka rta bad uba la ithuh paidbah kum u Zhong.
Kumta, la ong ba utei u khynnah u la khlad noh pat ha ka Sngi Palei, katkum ka jingpynbna na ka Myntri Kam bar ri jong ka Japan- ka Yoko Kamikawa.
La ong ba ki doktor bad ki nos ki la ialeh katba lah ban pynim ia utei u khynnah hynrei u la khlad noh hapdeng ka jingsumar namar ki jingmynsaw bad jingshitom ki la jur bad ka met jong u kam lah shuh ban ialeh pyrshah ia ka jingshitom na katei ka jingshah thombor dusmon ha katei ka jingjia.
Nangta ha ka janmiet jong ka Sngi Palei, la ong ba ki briew ki la leit ban leit buh syntiew ha khyrdop jong katei ka skul ha ka thaiñ Shekou ha Shenzhen, kaba long ruh ka jaka sah jong ki khynnah pule ba nabar ri.
Kane ka jingshah thombor jong utei u khynnah ka la jia ha katei kajuh hi ka sngi ba la kynmaw ïa ka jingjia ha u snem 1931 kaba la wanrah ïa ka thma hapdeng ka China bad ka Japan. Ka dei ruh ka tarik kaba khia ha ka por ba ka jingïadei hapdeng kine arliang ri ka don ha ka jingma kaba khraw.
Na ka liang ki bor pynïaid ka Japan ki la dawa ia ka China ba kan ai jingpynshai kaba bniah halor katei ka jingjia bad ban shim ruh ïa ki lad jingïada kiba pura na ka bynta ki khynnah pule jong ka Japan kiba sah bad pule ha China.
La ong ba kane ka long ka sien kaba ar ban sakhi ia kum katei ka jingjia ba ki khynnah skul nong Japan kin shah thombor dusmon ha China, hadien jong kawei ka jingjia ka jingshah thombor ha ka jaka pule jong ki nong Japan ha China ha kine ki bnai ba la dep.
