Jerusalem, Nailur:
Katkum ki khubor, la ong ba namar ka jingsniew palat ka jinglong- jingman ha Middle East, khamtam haba ka thma jong ka Israel ka la pur sa sha Lebanon pyrshah ia ki lehnoh Hezbollah jong katei ka ri, kumta kiba bun ki ri ki la hap ban pynsangeh noh ia ki liengsuiñ paidbah jongki namar ka jingbym shngaiñ jong ka jinglong-jingman ha kane ka por.
Ki Kad Liengsuiñ kiba la pynsangeh treikam noh ia la ki liengsuiñ ha kane ka por ki kynthup ia ka Air Algerie kaba dei ban leit sha Lebanon lane ban mih na Lebanon. Nangta ka Airbaltic kaba long ka Kad Liengsuiñ na Latvia kaba dei ban mih na Riga sha ka nongbah Tel Aviv. Nalor kata, kiwei pat ki Kad Liengsuiñ kiba la pynsangeh treikam noh shipor kiba kynthup ia ka Air France-KLM, Air India, Cathay Pacific, Delta Air Lines, Easyjet, Lufthansa Group, Ryan-air, Sundair, Sunexpress, United Airlines bad ka Lebanese Airspce Alerts.
Namar kata, ia kine ki Kad Liengsuiñ baroh la pynbna ban khang bad sangeh pyntreikam ia mynta shipor katba ka jinglong-jingman ha Middle East kam pat jai-jai ban pynïaid ia ka leit – ka wan namar ka jingbym shngaiñ jong ki lynti ïaid liengsuiñ nalor suiñ.
