Jerusalem, Nailur:
Ka tnat ïada Ri jong ka Israel ka la pyntip ba ki liengsuiñ ïapom jongka ki la ioh ban leit ther bom sha ki ktem jong lehnoh Hezbollah ha ka thaiñ Shatei Lam Mihngi jong ka Lebanon. Kane ka la jia ha ka por janmiet jong ka Sngi Palei ha kaba da ki spah tylli ki jaka pynher ‘namding jong ka Hezbollah ki la shah ther bom katba dang pynkhreh ban ther ‘namding sha Israel.
La iathuh naduh ka por mynstep ki liengsuiñ ia pom jong ka Israel ki la leit ther bom ia kumba 100 tylli ki liengsuin pynher rocket kiba don kumba 1,000 tylli ki pipa (barel).
Kumta, ka tnat shipai IDF jong ka Israel ka la pyntip ba kan nang bteng ban leit ther bom ia ki ktem bad ki jaka treikam jong ka Hezbollah na ka bynta ban ïada ia ki paidbah nongshong shnong jong ka Israel.
Kane ka jingleit thombor kaba jur jong ka Israel ka la long hadien ki jinghiar thma naduh kaba sdang jong kane ka taïew ba la kynnoh da ka Lebanon bad ka Hezbollah ba dei ka Israel kaba la pynbthei ïa ki ‘radio’ bad ki ‘pager’ jong ka Hezbollah ha kaba 37 ngut ki briew ki la ïap bad kumba 3,000 tam ki la mynsaw na katei ka jingjia ha Lebanon.
Ha ka jingkhynra ha ka janmiet Sngi Palei, la ong ba ka Israel ka la leit pynbthei da ki phew tylli ki bom ha kylleng ki bynta ba Shathie jong ka Lebanon.
U Myntri iada ri jong ka Israel, u Yoav Gallant, u la ong ba ka Israel kan iai bteng ia katei ka kam ban ialeh pyrshah ia ka kynhun lehnoh Hezbollah kaba ju ai jingkyrshan ia ki lehnoh Hamas naduh ba sdang jong ka jingleit hiar thma ka Israel sha ka nongbah Gaza.
Hynrei, na ka liang jong u Myntri kam bar ri jong ka Britain, u David Lammy, u la kyntu ia ka jingsangeh iasiat mardor hapdeng ka Israel bad ka Hezbollah jong ka Lebanon hadien shi taiew jong ka jingiakynad hapdeng jong ki.
Kumjuh ruh na ka liang ka United States, ka la pynpaw ka jingsngewkhia bad ka jingsheptieng kaba khraw ioh kane ka thma hapdeng ka Israel bad ka Hezbollah ruh kan nang klang bad nang pur sha baroh ki ri jong ka thaiñ Middle East. Kumta ka la maham ia ka Israel ba ka dei ban sangeh noh shi syndon ia ka jingleit hiar thma sha Lebanon namar kan sa ktah jur ia ka pyrthei baroh kawei.
Namar naduh kaba sdang hi jong ka thma ha Gaza, la iohi ba kitei ki lehnoh Hezbollah ki la ai jingkyrshan ratbah ia ka Hamas bad ki la dawa ruh ia ka Israel ba ka dei ban sangeh noh shi syndon ia ka thma hapoh Gaza lada ka kwah ban lait na ki jingma.
