Colombo, Nailur:
Ka Sri Lanka kaba la shah ktah jur ha ka liang ka ioh- ka kot, ha kane ka por pat ka dang pynlong ia ka jingjied President ba thymmai ha ka Sngi Saitjaiñ ha ka jingïalang kaba treikam bha halor ka jingthmu pynduna pisa jong ka pyrthei hadien ba katei ka ri ka la mad ia ka jingkyrduh kaba jur namar ka jinghiar ka khaii-ka pateng ha ki liang baroh. U President Ranil Wickremesinghe u dang ïakhun ïa ka thma kaba jur na ka bynta ban pynkhie im biang ia ka ioh ka kot jong katei ka ri kaba la hiar bad pulom jur baroh shi katta.
U Wickremesinghe, 75 snem ka rta, ha kane ka por bad ha kane ka sien u la wer ia ki paidbah ban iasnoh kti lang sa shisien pat ban ratdyngkhong ia ka jingduk-jingkyrduh bad ban pynkhie im bad pynkiew biang ia ka ri ha ki liang baroh na ka bynta ban wanrah ia ka bha- ka miat jong u paidbah nongshong shnong ka ri baroh kawei.
Hynrei ka jingpynkiew khajna jong u Wickremesinghe bad kiwei kiwei ki lad ki lynti kiba la pynjari katkum ki kyndon jong ka jingai jingïarap jong ka IMF kaba $2.9 billion, ka la wanrah jingeh ïa ki million ngut ki paidbah barit-baria kiba dang trei shitom ban pyndap pynbiang ïa ka jingdonkam ha iing- ha sem kaba man la ka sngi.
Pynban na ka liang uwei na ki nongdie kot khubor uba mih shakhmat ban kren na ka liang jong ki paidbah bad u bym shym kwah ban pynpaw kyrteng ialade u la ong ba ka ri ia mynta hi ka donkam ia ki nongialam ba thymmai khnang ban lah pynkylla dur ia ka jinglong-jingman hapoh ka ri bad ruh ban khyllie biang ia ki jingduh nong lane ka ioh- ka kot ba ka ri ka la duh baroh shi katta hapoh ka jing-ialam jong ki nongialam barim bad ka sorkar barim.
Namar kumba la iohi hi ia ka jinglong-jingman kaba la dep jia baroh shi katta, u Wickremesinghe un shah rem noh ha uwei napdeng ar ngut ki nongiakhun pyrshah jong u kiba kynthup ia u Anura Kumara Dissanayaka, u nongialam jong ka seng Marxist kaba mynshwa ka dei tang ka seng rit paid hynrei mynta pat katei ka seng ka la khlaiñ bor bad utei u nongialam ruh u la lah ban ieng ban ïakhun pyrshah ia une u nong-ialam ba hakhlieh duh jong katei ka ri ruh.
