Khorasan, Nailur:
Ki bor pynïaid ka Iran ha ka Sngi U Blei ki la pyntip ba 51 ngut ki la khlad noh na ka jingbthei ki tyndong lyer na ka par dewïong ha ka thaiñ Shathie jong ka Khorasan ha Iran bad 20 ngut tam pat ki la mynsaw ha katei ka jingjia. Kane ka jingjia ryngkhat ka dei na ka daw ka jingbthei ka tyndong ‘Methane Gas’ ha ki ar tylli ki block B bad C jong ka par maw kaba hap hapoh ka jingkhmih jong ka kompeni Madanjoo.
La ong ba kumba 76% na u dewiong jong ka Iran, u dei uba wan poi bad shalan na kane ka thaiñ bad kumba 8 haduh 10 tylli ki kompeni heh ki trei ha kane ka thaiñ kynthup ia ka kompeni Madanjoo, la iathuh u Lat jong ka South Khorasan Province, u Ali Akbar Rahimi haba iakren bad ki lad pathai khubor ha ka Sngi U Blei. Utei u Lat u la iathuh ruh ba ki bor pynïaid bad ki kynhun iarap ki la ioh ban pyllait im ia kitei kiba don ha ka block-B, bad napdeng jong 47 ngut ki nongtrei kiba don ha katei ka block, 30 ngut ki dei kiba la khlad bad 17 ngut pat kiba mynsaw.
Katba la ong ba ki bor pynïaid bad ki tnat iarap ki dang ialeh ban pyllait im sa ia kito kiba don ha ka block-C la shem pynban ba ka jingkhluit jong ka lyer ‘Methane’ ha katei ka block ka long kaba jur katta katta bad ka jingïarap jong ki kan kham shim por kumba 3-4 kynta.
Katkum ka jingtip ba la ioh lum, la ong ba ki don 69 ngut ki nongtrei ha baroh 2 tylli kitei ki block ha ka por ba katei ka jingbthei ka la jia.
Kumta, ia kitei 17 ngut kiba mynsaw la pynkit noh sha ka hospital kaba jan tam bad kumba 24 ngut pat la ong ba ki dang jah rngai haduh ka janmiet Sngi U Blei ba la ioh lum ia kane ka khubor.
Haba iadei bad kane ka jingjia, u President Masoud Pezeshkian u la phah ia ka jingsngewlem sha ki bahaïing-bahasem jong kitei kiba la khlad noh bad u la kyntu ruh ia ki bor pynïaid ba dei khmih ha katei ka nongbah ba kin peit bniah bad kin ialeh ban ai ia ka jingsumar kaba biang tam.
na ka bynta kito kiba mynsaw bad kiba dang shah sumar baroh. Ha kajuh ruh ka por u la bthah ia ki tnat bad ki bor ba dei khmih ba kin trei shitom ban wad ia kitei kiba dang jah rngai baroh khnang ba kiei-kiei baroh kin ïaid beit- ïaid ryntih bad yn ioh ban leh ia kaba donkam baroh ha ka por kaba biang.
