Jowai, Nailur 24
Ka shlem treikam u District Sports Officer (DSO), West Jaiñtia Hills ryngkat ka jingïatreilang bad ka West Jaiñtia District Sports Association (WJDSA), kan pynlong ïa ka lympung ïalehkai ‘Open Volleyball Championship – 2024’ na ka bynta ki shynrang bad kynthei ha u Risaw mynta u snem.
Kumta kane ka shlem treikam ka la khot bad kyrpad ïa baroh ki klob, ki skul, ki kolej, ki kynhun seng ïalehkai ban wan ïashim bynta ha kane ka lympung. Ka tarik khatduh (Entry) ban pynpoi ïa ki kyrteng kan long ha ka 9 tarik u Risaw. La kyrpad ïa ki skul jong ka district kumjuh ki klob bad kynhun seng ïalehkai kiba kwah ban ïashim bynta ban shim ïa ka entry form na ka ophis u DSO ha ka por long treikam. Ïa ka tarik kaba thikna bad ka jaka ban pynlong ïa ka jingïakop yn sa pyntip hadien.
