Washington, Nailur:
Ki pulit ka Alabama ha ka Sngi U Blei ki la iathuh ba 4 ngut ki la kyllon iap ha ka jingsynreit kuli bad ka jingiakynad kaba la mih ha ka nongbah Alabama ha ka Sngi Saitjaiñ.
Namar la ioh khubor ba ki don ki kynhun kiba iakynad bad kiba la poi shaduh u pud jong ka jingiather kuli bad kaba la wanrah ia ka jingiap jong kitei 4 ngut ha ka distrik Five Points South jong ka Birmingham ha ka por kumba 11:00 jong katei ka miet.
La ong ba ki pulit ki lap ruh ia 2 ngut ki shynrang bad kawei ka kynthei, ki bym tip briew shuh bad kiba la thiah ha katei ka surok hadien ba ki la ngat ha katei ka jingshah synreit kuli. Hynrei, baroh 4 ngut ki la khlad noh hadien ba la poi ha jakasumar katba dang pyrshang ban sumar bad pynim ia ki.
Ym tang katta, hynrei ki don ruh da ki khat ngut kiba la ngat bad mynsaw ha katei ka jingjia, ha kaba 4 ngut napdeng jong ki, ki dei kiba la mynsaw jur bad don hapdeng ka jingma kaba khraw. Katba kitei kiwei pat ki don la ki jong ki jingmynsaw watla ki long kiba rit hynrei ka jingmynsaw ka la jur tangba kam dei kaba ap jingma ia ka jingim jongki.
Haba iadei bad kane, la ong ba ki pulit kim shym pat la ioh bat ne ioh kem iano- iano ruh kiba don kti ha katei ka jingjia bad kumta na ka liang jong ki pulit ruh ki la kyntu ia ki paidbah kiba don jingtip eiei shaphang katei ka jingjia, ba kim wan shakhmat ban phla bad ai jingtip sha ki pulit khnang ba ki pulit bad ki bor ka aiñ kin ioh ban leh ia kaba donkam baroh, na ka bynta ka suk- ka shngaiñ jong ki paidbah nongshong shnong hi.
La ong ba ki don katto katne ki tnat ki ban hap ban iatrei lang bad ban wad bniah ne bud-dien haba iadei bad kane ka jingjia, kynthup ia ka tnat Federal Bureau of Investigation bad ka Bureau of Alcohol, Tobacco, Firearms & Explosives.
La iathuh ba ki briew jong ka kynhun pynlip ding ki la leit mar-mar sha katei ka jaka ha katei ka miet Sngi Saitjaiñ ban ioh tehlakam lada don kano kano ka jingkem ding ne jingpluh na katei ka jingiasiat. Kumta ki la ker-kut noh ruh ia katei ka thaiñ khnang ban lait na kino-kino ki jingma ia ki paidbah nongshong shnong. Hynrei la ong ba wat haba ki pulit bad ki bor pynïaid ki la leit poi sha katei ka jaka ha ka por kaba biang, kim shym la lap daw ne lap ksai eiei tang khyndiat ruh haba iadei bad katei ka jingsiat ha katei ka miet bad ki la lap sa tang ia kito kiba mynsaw bad kiba la thiah iapler ha katei kajuh ka jaka.
Katkum ka kaiphod jong ka Gun Violence Archive, la shem ba ki don palat 400 tam ki jingjia synreit kuli ne ki jingiasiat hapoh US wat tang hapoh jong une u snem 2024 marwei.
Palat 12,000 ngut ruh ki briew kiba la khlad na kitei ki jingjia tang hapoh jong une u snem 2024 ha ki jingjia kiba la sakhi kylleng jong ka United States.
Ka daw jong ka jing-jur palat jong kine ki jingjia ha kine ki sngi, ka dei namar ka jinglaitluid palat ki kyndon rah suloi lane ka iadie-iathied suloi kaba suk khlem jingpyrkhing. Kane ka la pynsuk ia ki paidbah khamtam kito kiba don jingmut sniew ba kin iohlad ban leh ia kano- kano ka kam thombor katba ki sngewbit bad sngew kwah ban leh.
