Beirut, Nailur:
Katkum ki khubor, la ong ba ka jingleit ther bom jong ki liengsuiñ ka Israel sha ki ktem lehnoh jong ka Hezbollah kiba don hapoh Lebanon, ka la shim ia kumba 500 duna ki mynsiem briew ha ka Sngi Nyngkong, kynthup ia ki 35 ngut ki khyllung-khynnah kiba don ha kitei ki bynta ba ka Israel ka leit thombor ha katei ka sngi. Kane ka long ka jingleit thombor kaba jur tam jong ka Israel pyrshah ia ka Lebanon bad ka bym pat ju jia mynno- mynno ruh ha ki por ba la leit naduh ba sdang ka jingiakynad hapdeng ka Hezbollah bad ka Israel namar ka thma jong ka Israel ha ka nongbah Gaza.
Kumta la ong ba ki ri Arab ki la pynrem jur ïa ka Israel halor kane ka jingleit thombor ha katei ka sngi namar la ong ruh ba ka jingiakynad jong ka Israel bad ka Hezbollah ka la heh bad shyrkhei bha ha kine ki sngi kaba lah ruh ban poi sha u pud jong ka jingiakhun thma sa bad katei ka kynhun lehnoh Hezbollah jong ka ri Lebanon.
Kane ka jingleit thombor jong ka Israel ia katei ka kynhun lehnoh ka Lebanon, ka long hadien ba ka Hamas bad kiwei de ki kynhun lehnoh ki la sdang ban leit hiar thma nyngkong eh ia ka Israel ha ka 7 tarik u Risaw jong u snem 2023 bad ka long ruh ka thma ka bym pat ju jia koit mynno- mynno ruh ha Middle East.
Kumta, ka Israel ha kane ka por ka la pyntip ba ka la ioh ban pyniap ïa shibun bah ki dkhot ehrang jong ka kynhun lehnoh Hezbollah hadien ba ka la ioh ban leit hiar thma sha ki 1,600 tylli ki jaka ha ki bynta ba Shathie bad Shatei Lam Mihngi jong ka Lebanon, kynthup ruh ïa ka jingleit hiar thma sha Beirut ha kaba ki shipai ïada ri jong ka Israel (IDF) ki khot ia katei ka thma, da ka “Operation Northern Arrows”.
Ka Hezbollah, ka iathuh ba U Ali Karake, uba dei u nongialam ba lai jong ka, hynrei u dang im bad u la ioh ban leit phet rieh noh sha ki jaka ba kham shngaiñ bad ia kane ka Hezbollah ka la pynbna hadien ba la iohsngew ba ka jingleit thombor jong ka Israel ha katei ka sngi ka long ban ioh shim ia ka jingim jong utei u heh nongialam jong ka.
