Imphal, Nailur:
Ki la don kumba saw tylli ki kynhun jong ki pulit ka tnat Central Reserve Police Force (CRPF) kiba la poi ha Manipur bad kine mynta ki don hapoh ki jaka bashong-basah ki Kuki kum ha Kangpokpi, Motbung, Dolaithabi, Geljang, ha kaba kine ki la shim ïa ka jaka jong ki shipai 22 Assam Rifle, la ïathuh ka tyllong khubor bahakhlieh duh.
Ha kaba ïadei bad kane, ka sorkar kmie ka la pynpaw ïa ka jing-sngewkhuslai ïa ka jylla namar ba ka la pynmih jingpynbna halor ka khubor maham jong ki kynhun wad bniah halor ka jingdon jong ki “900 ngut ki lehnoh Kuki”, khlem da buh ïa kino kino ki khubor pyntriem, la ïathuh ki tyllong khubor.
Ka tyllong khubor kaba la wan na ka tnat CRPF, la ong ba ka jingthmu jong ki kan long sha ki ktem jong ki shipai Kuki (KRA) bad ki shipai Kuki (KLA) kiba don ha T Gamnon.
Ka jingpynbna jong ka jylla ka la kdew ba palat 900 ngut ki lehnoh Kuki, kiba dang shu shah hikai thymmai ha ka jingpyndonkam ïa ki bom, ban siat da ki kuli, ki Missile, bad ki jingïaleh ha ki bynta ba long khlaw, ki la rung sha Manipur na Myanmar.
Ka la ïathuh ruh ba ki lehnoh ki don ha ki kynhun jong ki 30 ngut ki dkhot ha kawei pa kawei ka kynhun, kiba la shang sha kylleng ki jaka, bad la khmih lynti ba kin pynlong ïa ki jinghiar thma ba bun jait ha ki shnong Meitei ha ka 28 tarik u Naitung.
Kane ka jingpynbna ka long kaba sngew shyrkhei bad ka la ai ïa ki jingtip kiba thikna shaphang ki rukom shah hikai jong ki lehnoh bad wat ïa ka tarik kaba thikna jong ki jingshah thombor, kynthup ïa ka jingdon jong ki kynhun.
Ka tyllong khubor ka la ïathuh shuh shuh ba katkum ka jingpynshisha jong ki kynhun ba dei khmih kiba la wad bniah halor kane ha ryngkat ka jingïatreilang jong ki shipai, ki la ong ba kam shym la don kum kane ka jingwan rungtuh bad ym don ei ei kaba lah ban sakhi katkum ka jingtip jong ki. Ka sorkar kmie ka kwah ïa ka jingsuk bad ka jingthmu ka long ban pynbeit ïa ka jingïakynad hapdeng ki jaitbynriew, la ïathuh ki tyllong khubor. “Ka por jong kane ka jingpynrung la ïohi ruh kum ka jingpyrshang ban pynthut ïa ka jingïasuk namar ba u Myntri kam pohïing u la pynbna ïa ka jingsdang jong ka jingïasuk bad sdang ïa ka jingker ïa u pud u sam jong ka India Myanmar,” ki la ong. Hashwa kane, u Security Advisor u Kuldeep Singh u la ong, ha ka jingïalang bad ki nongthoh khubor, “Ngi dang khmih bniah ïa ki jingpynshisha jong kane ka jingpynrung bad halor kane la donkam ïa ki sakhi bashisha.”
Naduh u bnai Jymmang, 2023, ka Manipur ka la ngat ha ki jingeh namar ka jingdon jong ki jingïakynad hapdeng ki jaitbynriew Meitei kiba bun paid bad ki jaitbynriew Kuki kiba rit paid, kaba la pynlong da ki jingïakynad halor ki jingmyntoi ha ka ïoh ka kot bad ki bhah ba la mang kyrpang.
Ka Manipur ka dang don ha ar tylli ki jaka kiba dang don ha ki jingïakynad kaba long ha ka them ba la synshar da ki Meitei bad ha ki jaka lum bashing-basah ki Kuki , ïa kiba la pynïakhlad da ka jaka bym don nongsah briew ba la khmih da ki shipai jong ka sorkar kmie.
Wat hapdeng ki jingpyrshang ban pynjem ïa ka jingïakynad, ki jingïakynad ba man ka por ki dang ïai bteng, ha kaba ka jingïakynad kaba khatduh ka la pynlong ïa 11 ngut ki briew ba kin duh ïala ka jingim ha basdang jong une u bnai. Naduh u bnai Jymmang jong u snem ba la dep, ki jingïakynad ki la ïai bteng ha kaba ka la shim ïa ka jingim jong kumba 237 ngut bad pynkynriah jaka ïa palat 60,000 ngut ki briew ha Manipur, kaba dei ka jaka sah jong ki 3.2 Million ngut ki briew.
