Shillong, Nailur 26
Shi bynta ban rakhe ïa ka World Tourism Day, ka Real Sports India (ba la tip kum ka Sportive) kan pynlong ïa ka jingïakob mareh bad ïaid kjat 5 kilometre lane ka 5K Run/Walk ha kane ka nongbah ha ka step jong ka Sngi Thohdieng.
Ka jingthmu jong kane ka jingïakob ka long ban wanrah ka jingïajan hapdeng ki briew bad ka mariang da kaba sumar khuid ïa ka jingitynnad ki jaka jngohkai kiba don ha kane ka Jylla, la pynpaw u Uttam Dhar uba la mihkhmat na ka Real Sports India haba ïakren bad ki lad pathai khubor ha ka Sngi Palei.
Ka Real Sports India ka la pynlong teng ïa ka Mawlynnong Runsafari ha ki ar snem ba la lah na ka bynta ban kyntiew ïa katei ka jaka jngohkai bad mynta u snem kan pynkhreh ban pynlong sa ka Mawphanlur Run- safari Marathon ka ban long ha u Nohprah 2024.
“Wat la ka long kaba kyrkieh, hynrei ngi khmih lynti ba kin don kumba 150 ngut ki ban wan shim bynta ha kane ka jingïakop,” u la bynrap.
Ha kaba ïadei bad ka 5K Run/Walk kan sdang ha ka por 6 baje mynstep na Dhankheti Parking Lot (mar pyrshah Eldorado Guest House) sha Don Bosco School, Laitumumkhrah Beat House, Fire Brigade, sha St. Edmunds College ban wanphai biang sha Dhankheti, Malki, Barik, Civil Hospital ban rung pat sha Central Library bad ban phai biang sha Barik, Malki na ka bynta ban pynkut pat ha Dhankheti.
