Shillong, Nailur 27
Ka Smit SC bad ka Laitkyrhong SC ki la ïoh jingjop ha ka lympung ïalehkai Second Division Football League 2024 ba la pynïaid da ka Shillong Sports Association ha ka Sngi Thohdieng.
Ha kane ka jingïakhun kaba la long ha SSA Stadium kaba ha Polo, ka Smit ka la pynliem noh ïa ka Imson SC da 3-1 kol. U Nathaniel Kharbangar u la ïoh ban thep ar kol (16 & 41minit) bad ïa kawei pat la thep da u Nangsan Warlarpih (77). Katba na ka Imson la thep da u Amosly Nongbri (66min).
Haba phai sha kawei pat ka jingïakhun kaba ar, ka Umphrup SC ka la shah rem noh ha ka Laitkyrhong SC da 1-0 kol. Ïa kane la thep da u Samboklang Kurkalang uba la thep ha ka minit kaba 71.
Ka jingïalehkai semifinal jong ka Third Division ha ka sngi Saitjain kan long hapdeng ka Mawryngkneng SC pyrshah ïa ka Mawpat SC ha ka por 12 baje, katba ka Umpling SC ïa ka Tynring SC ha ka por 3 baje janmiet.
