Jerusalem, Nailur:
Ki paidbah nongshong shnong ka nongbah Gaza ha kane ka por ki la pynpaw ka jingsngewkhia bad ka jingsheptieng kaba jur ruh ioh ka thma-bah kan khie namar ka jing-leit thombor jong ka Israel ia ki ri marjan jong ka. Kane ka long ruh hadien ba ka Israel ka la leit ban hiar thma sha ki ktem jong ki lehnoh Hezbollah jong ka ri Lebanon bad kaba la wanrah ruh ia ka jingsyier kaba khraw ia ka shongsuk-shongsaiñ khamtam ha ka thaiñ Middle East baroh kawei namar katei ka jingleh bym salia jong ka Israel ia ki kyndon bad ki jingkyntu jong kiwei pat ki ri kiba la khang bad kyntu ia ka Israel ba kan sangeh noh ia ka jingiakynad bad ki lehnoh Hamas khamtam eh ba ki lehnoh Hezbollah namar ka lah ban wanrah ia ka thma-bah kaba jur hapoh Middle East bad kumjuh ruh ha ka pyrthei baroh kawei.
Namar la ong ba ka Israel ka la leit hiar thma biang sha Lebanon ha ka sien kaba lai ha kane ka Sngi Balang, ha kaba ka Israel ka la pynbna ia ka jingleit thombor bad jingleit ther bom jong ka sha ki jaka treikam bad ki ktem lane ki jaka buh tiar siat jong ki lehnoh Hezbollah ha ki bynta ba khappud jong ka Lebanon.
Shuh shuh ruh la ong ba naduh ba sdang jong ka jingleit hiar thma bad ka jingleit kput jong ka Israel ia ka kynhun lehnoh Hamas kaba synshar hi ia ka nongbah Gaza da ki phew snem mynta, ki kyndon lehnoh bad ki ri lehnoh bapher ki la mih ban ai jingkyrshan ia ka Hamas, da kaba byrngem ruh ia ka Israel ba ka dei ban sangeh noh shi syndon ia ka thma lada kam kwah ban shah pynthud ne shah thombor ha kitei kiwei pat ki ri lehnoh lane ki kynhun lehnoh jong ki ri ba marjan. Kitei ki lehnoh ki la dawa ruh ia ka Israel ba ka dei ban sangeh noh shi syndon ia ka thma hapoh Gaza lada ka kwah ban lait na ki jingma kiba ap sawdong jongka.
Ha kajuh ruh ka por la ong ba katei ka jingleit hiar thma jong ka Israel sha Lebanon ha kane ka sien, ka la long ka thma kaba jur tam ba katei ka ri kam pat ju ioh mad hadien jong ka thma poh-iing kaba la jia ha kik snem 1975 haduh 1990, ha kaba ka jingdon kiba khlad na ka jingleit hiar thma ka Israel ha kane ka sien ka la kot ia ka 500 tam.
Namar na ka liang ka Israel ruh, ka la khie bitar ia ka jingleit ai jingkyrshan jong ki lehnoh Hezbollah ia ka Hamas naduh ba sdang jong ka jingleit hiar thma jong ka sha Gaza bad kumta ka Israel ruh ha kane ka sien ka la leit thombor da kaba tyngeh ia ka Hezbollah khnang ba kan ym nud shuh ban pyn-eh ne ban dang byrngem biang ia ka Israel nangne shakhmat.
Haba iadei bad kane pat, la ong ba ki paidbah nongshong shnong ka nongbah Gaza, ki la pynpaw ia ka jingsngewlem bad ka jingsngewkhia halor ka jingeh ba ki nong Lebanon ki la ioh mad kumba long ma ki hi hapoh Gaza namar ka jingleit thombor jong ka Israel.
La ong ba katei ka jingleit ther bom jong ka Israel sha Gaza ha kitei ki 3 sngi, ka la shim ia ka jingim jong palat 500 tam ki nong Lebanon bad kumba 3,000 tam ruh kiba la mynsaw na ka jingbthei ki bom ba la siat da ki liengsuiñ ka Israel sha ki jaka ba don ki ktem lehnoh Hezbollah.
