Shillong, Nailur 27
Na ka liang jong ka Newcastle United; ka klob ïalehkai phutbol ha ka lympung Premier League ka pynbna paidbah ba u CEO jong ka u Darren Eales, un hiar shuki noh na ka kam hadien ba la lap ba u don ïa ka jingpang bampong ha ka snam.
La kha ïa une u rangïalehkai ba 52 snem ka rta ha Chelmsford bad u la leit sha Newcastle ha u Naitung 2022 na ka klob ïalehkai ha ka lympung Major League Soccer (MLS) ka Atlanta United, ha kaba u la shakri kum u President bad u Heh Executive naduh ba la seng ïa ka ha u snem 2014.
Ha ka por ba u don ha St James’ Park, ka Newcastle ka la poi sha ka phainal kaba nyngkong eh hapoh ka ri ha ki 24 snem, ha kaba ka la shah rem noh ha ka final jong ka League Cup pyrshah ïa ka Manchester United ha u snem 2023, bad ruh ka la wanphai biang sha ka Champions League ha ka samoi ba la dep.
“Ka jinglong CEO jong ka Newcastle United ka dei ka jingkyrkhu kaba phylla bad nga sngew sarong haduh katta-katta ban long shi bynta jong ka jingïaid lynti kaba sngewtynnad jong ka klob,” la ong u Eales ha ka kyrwoh.
“Hynrei ka la paw shai ha nga ba mynta ka dei ka por kaba biang ban shim ïa kane ka rai khnang ba ngan lah ban buh hakhmat eh ïa ka koit ka khiah bad ïa ka ïing ka sem jong nga. Ha ka por ba lyngkot, kan long ka kam kumba ju long ha kaba ïadei bad ka jingpynïaid ïa ki kam ba man la ka sngi jong ka klob, bad ngan ai ïa ka jingkyrshan ba pura jong nga ïa ka por ba kylla ka ban pynlah ïa ka board ban bishar bniah bad thung ïa u nongmihkhmat jong nga”.
Shuh shuh na ka liang jong utei u CEO u la bynrap ruh, “Nga sngew sarong ïa kaei kaba ngi la ïohlang bad nga sngewkmen ban ïohi ïa kaei kaba don hakhmat na ka bynta baroh katba ka klob ka nang tei sha ka lawei jong ka jingjop kaba neh.”
Na ka liang jong katei ka klob ka ïathuh ruh ba u Eales un bteng ban ïalam ïa ka kynhun pynïaid jong ka klob tad haduh ban da thung ïa u nongmih bujli u ban shimti ïa katei ka kam ha ka jaka jong u.
