Moscow, Nailur:
U President ka Russia- u Vladimir Putin ha ka Sngi Palei u la byrngem tyngeh ia ki ri na ka thaiñ baroh kawei halor ka jingshah thombor jong ka Russia ha kane ka sien. Kane ka jingbyrngem jong ka Russia kan kynthup ruh naduh ka United Kingdom (Britain) kaba la ai jingkyrshan ia ka Ukraine da kaba ai jing-iarap da ki tiar ïakhun tham lane ki ‘namding.
Kumta, la ong ba u Putin ha katei ka sngi u la leit ban shong jing-ialang kyrkieh bad ki heh ka tnat ïada ri jong ka Russia na ka bynta ka jingpyndonkam ia ki tiar ‘Nuclear’ kiba ka Russia ka la pynap la slem hynrei ha kane ka por u Putin u la rai ban leh eiei noh namar la iohi ba ka thma ruh kam shym kut shuh tang kumne bad ha kajuh ruh ka por la iohi ba ka Ukraine ruh kam shym treh ban pyndem noh hakhmat ka Russia.
Kumjuh ruh la ong ba kane ka jingbyrngem jong ka Russia ha kane ka sien ka long hadien ka jingsheptieng jong u Putin halor ka jingai lad jong kiwei pat ki ri na West kynthup ia ka UK bad ka US, kiba la shah ia ka Ukraine ba kan pyndonkam da ki ‘namding ba khlaiñ bor kiba ka la ioh na kitei ki ri kiba ai jingkyrshan ia ka.
Kum ban shu kdew hangne, ha ka taiew ba la dep ka UK ka la ai jingbit ia ka Ukraine ba kan pyndonkam ia ki ‘namding ‘Storm Shadow’ ha ka jing-iakhun thma pyrshah ia ka Russia.
