Kyiv, Nailur:
Katkum ka kaiphod ba la pyllait da ka Ukraine ha kane ka por, la ong ba ka Russia ka la duh haduh 651,810 ngut ki shipai naduh kaba sdang jong ka jingleit hiar thma pura jong ka sha Ukraine ha ka 24 tarik Rymphang 2022. Kane ka jingkheiñ ba la pynmih da ka Ukraine ha ka 29 tarik u Nailur, ka kynthup lang ïa ki 1,170 ngut ki shipai Russia kiba kyllon iap hapdeng ka jingiakhun bad ka Ukraine tang hapoh jong ka shi sngi.
Nalor ka jingiap jong ki shipai, ka kaiphod ka ong ba ka Russia ka la duh haduh 8,869 tylli ki tup thma, 17,476 tylli ki kali thma kiba lah ban shah ia ki kuli lane ki bom bad la kynthup ruh ia ki 25,495 tylli ki kali bad ki tup umphniang.
Kiwei pat ki jingduhnong kiba kongsan ba ka Russia ka la mad hapdeng ka jingiakhun thma jongka pyrshah ia ka Ukraine ha kine ki 3 snem duna, ki kynthup ia 18,795 tylli ki tiar siat suloi, 1,204 tylli ki tiar pynher roket, 962 tylli ki tiar iada suin, 369 tylli ki liengsuin, 328 tylli ki liengsuin, 16,186 tylli ki drone, 28 tylli ki lieng bad kawei ka liengsuin ba kyrpang jong ka Russia.
Hynrei ha katei hi kajuh ka sngi, la iathuh ba ym duna ia ka 16 ngut ki briew jong ka Ukraine ki la mynsaw na ka daw jong ka jing- thombor ka Russia ha Zaporizhzhia, kaba don ha ka thaiñ Shathie jong ka Ukraine.
Ha ka thaiñ Donetsk kaba marjan pat, la iathuh ba ki don 3 ngut kiba la khlad noh hadien ka jingleit ther bom ki shipai ka Russia ia ka Pokrovsk, ka nongbah kaba ka thma ka dang iai bteng bad ïaid shakhmat naduh ba ka Russia bad Ukraine ki la sdang ia ka thma.
