Hampton, Nailur:
Uwei u briew na Long Island u la shah pynngat hapoh ki kyndon pynïap briew hadien ba la lap ia ka jingpyniap jong u ïa la u paralok ha ka por ba ki la ia dih buaid bad ka la mih ka jingïakynad hapdeng jong ki hapoh Hamptons ha ka step jong ka Sngi Saitjaiñ. Ki pulit ki la kem noh ia U Jeremy Allen, 43 snem ka rta, hadien ba ki la lap ia ka metiap jong u Christopher Hahn, 43 snem ka rta, kaba u la buhrieh hapoh ka plastic tarpar, kaba don ha ka phyllaw ba shadien jong ka iing u Allen.
Katkum ka jing-iathuh jong ki bor pyniaid, kitei ki ar ngut kiba la buaid ki dang iakren ia ka jingthmu jong ki ban ialeh ban sangeh lane ban ieh kiad noh, ha kaba uwei napdeng jongki u la khie bitar pynban bad baroh ar ngut ki la sdang sa ka ban pyni bor ha kaba ki la poi sha u pud ka jingiapyni bor, ha kaba la ong ba u Allen u la shoh khlem sangeh ia u Hahn haduh kumba 6 kynta kynthih ha shwa ba un tied na ki bynta jong ka khlieh bad ot ia u ryndang da ka wait kaba don ha iing. Kumta, ka nongmudui jong ka Suffolk County, ka Elena Tomaro, ka la ong ba kane ka jingshah thombor utei u rangbah, ka long ka jingjia kaba shyrkhei bad kaba ngin ym lah shuh ban peit da ki khmat lade lada ngi ioh ban sakhi ia katei ka jingjia namar ka jingmynsaw jong utei u rangbah ba shah pyniap ruh ka la shyrkhei haduh katta.
Kumjuh ruh na ka liang jong u nongïasaid aiñ u Allen pat, u la iathuh ba kitei ki arngut shi paralok ki dang dep ia leh kmen, leh sngewbha lang ha ka por ba ki dang sdang plied ia ki bitor kyiad ha katei ka sngi. Hynrei, la ong ruh ba u Allen u la don dak sniew lypa naduh u snem 2007 ba ki pulit ki la pynngat kyndon ia u halor kiwei pat ki kam thombor kiba u la leh kumtei hi, ha ka por ba u la dih buaid bad um tip briew shuh. Hadien ba u la dep leh ia katei ka kam, u Allen u la phah message sha u nongtrei kam shnong jong katei ka shnong bad ban khot ia u ban leit iarap pynkhuid lem ia katei ka jaka, ha kaba utei u nongtrei shnong um shym treh ban iarap ia u Allen ha katei ka por namar ka jingsheptieng ioh un shah pynngat bad shah pharep don kti lang ha katei ka kam pyniap. Kumta, u la leit ban peit tuh ia kaei kaba la jia ha katei ka jaka, ha kaba u la shem ia ka metiap jong u Hahn bad mar kumta hi utei u nongtrei jong ka shnong u la pyntip noh mar-mar sha ki pulit ka Southampton Town ba kin ioh ban leh ia kaba donkam baroh.
Ki pulit ki la leit poi sha katei ka shnong ha ka por kumba 10 baje jong ka step Sngi Saitjaiñ bad ki la pynbna iap noh syndon ia u Christopher Hahn khlem da pynkit ne rah shuh ia u sha ka jaka sumar ban da pynbna iap bad pyntikna da ki doktor bad nongsumar.
Ki pulit ki la kem bad bat noh ia u Jeremy Allen ha ka Sngi Saitjaiñ ban tohkit tang kumba katto- katne kynta hadien katei ka jingjia bad dei ha ka Sngi U Blei ba ki la pynngat noh syndon ia u hapoh ki kyndon pynkheiñ aiñ jong ka jingpyniap briew namar katei ka kam thombor kaba u la leh, pyrshah ia la u jong u paralok uba dang ialeh sngewbha lang bad u ha katei ka step.
Ki pulit ki iathuh ruh ba u Allen u dang sahkut ha kawei ka mukotduma kaba la ujor pyrshah ia u ha u snem 2022, hadien ba la shem ia u ba u ñiah kali hapdeng ka jingbuaid.
Haba iadei bad kane, la ong ba kane ka jingjia ka long ruh tang hadien jong kawei ka mukotduma ba la leit ujor hapoh ka nongbah Ohio, ha kaba uwei u rangbah uba la 40 snem ka rta u la shah pynngat ha ki kyndon pykheiñ aiñ jong ka jingpyniap briew hadien ba u la shoh pyniap ia la ka jong ka kmie ha ka por ka jingiania bad jingiakynad kaba jur kaba la mih hapdeng jongki. Kane pat ka jngjia, ka la jia ha Green Township ha kaba ka kmie jong u Kenneth Mortimer ka la kyntait ïa ka jingkyrpad jong u ban sah miet ha ïing jong ki.
